حەببیب نۆرمحەمەدۆڤ

سەرەتا

خەبیب عەبدولمەناپۆڤیچ نۆرمحەمەدۆڤ یان حەبیب نۆرمحەمەدۆڤ (بە عەرەبی: حبيب عبدالمناف نورمحمدوف، بە ئینگلیزی: Khabib Abdulmanapovich Nurmagomedov)، لە ٢٠ـی ئەیلوولی ساڵی ١٩٨٨ لە گوندی سیلدی سەر بە داغستان لەدایکبووە. یاریزانێکی موسڵمان و پیشەگەری زۆرانبازیی ڕووسییە. لە بەشی کێشی سووک بۆ پاڵەوانێتی جەنگە مەزنەکان (UFC) Ultimate Fighting Championship بەشداری کردووە، پاڵەوانێکی هەمیشەیی کێشی سوکی UFC بووە، لە نیسانی ٢٠١٨ تاکوو ئازاری ٢٠٢١ براوەی یەکەمی نازناوەکە بووە. ناوی نۆرمحەمەدۆڤ لە ٣٠ـی حوزەیرانی ٢٠٢٢ خرایە ناو هۆڵی یاریزانە بەناوبانگەکانی UFC، بە ٢٩ بردنەوە و هیچ دۆڕاندنێک، بە بەدەستهێنانی ژمارەیەکی پێوانەیی بێ دۆڕان وازی لە یاریکردن هێنا.

ناساندن

خەبیب عەبدولمەناپۆڤیچ نۆرمحەمەدۆڤ لە بنەماڵەی ئاڤار لە ٢٠ـی ئەیلوولی ١٩٨٨ لە گوندی سیلدی لە ناوچەی تسومادینسکی لە داغستان لەدایکبووە، کە کۆمارێکی خۆبەڕێوبەرە لە چوارچێوەی ڕووسیا و یەکێتیی سۆڤیەت. لە بنەماڵەیەکی موسڵمان لەدایکبووە و پەیڕەوی لە ئایینی ئیسلامی سوننە دەکات. برا گەورەکەی ناوی ماگۆمێدە و خوشکە بچووکەی ناوی ئامینەیە. خێزانەکەی باوکی لە سیلدیەوە ڕوویان لە کیرۆڤاول کردبوو، لەوێ نهۆمی خوارەوەی تەلارەکەی گۆڕی بۆ هۆڵی وەرزشی. نۆرمحەمەدۆڤ لەگەڵ خوشک و برا و ئامۆزاکانی لەو ماڵەدا گەورە بووە. حەز و ئارەزووی بۆ هونەری جەنگی لەو کاتەوە دەستیپێکرد کە سەیری ڕاهێنانی خوێندکارەکانی باوکی دەکرد لە هۆڵە وەرزشییەکە.

لە منداڵییەوە حەزی بە زۆرانبازی کردووە و لە تەمەنی هەشت ساڵییدا لەژێر سەرپەرشتیی عەبدولمەناپۆڤیچی باوکی، دەستی کردووە بە یاری زۆرانبازی. عەبدولمەناپۆڤیچ وەرزشوانێکی بەناوبانگ و سەربازێکی خانەنشینە لە سوپای سۆڤییەت، لە تەمەنێکی کەمەوە وەرزشی زۆرانبازی کردووە، لەگەڵ وەرزشەکانی جۆدۆ و سامبۆ.

شێوازی یاریکردن

نۆرمحەمەدۆڤ شێوازێکی زۆرانبازی پەیڕەو دەکات کە فشارێکی زۆر و ماندووکەر لە دژی نەیارەکەی بەکاردەهێنێت، ئەم شێوازەی یاریکردنە زۆرجار بە (ماوڵینگ) وەسف دەکرێت. بە بەکارهێنانی چەندین جۆری زۆرانبازی و جودۆ و سامبۆ، بەرانبەرەکەی دەلکێنێت بە قەفەسەکەوە و قاچ و قۆڵیان توند دەکات بۆ ڕێگریکردن لە هەڵهاتنیان. بەمشێوەیە نەیارەکەی ماندوو دەکات و هێرش دەکاتە سەر بەرانبەرەکەی و بەرانبەرەکەشی بەهۆی ماندوو بوونییەوە ناتوانێت بەرگری بکات لە لێدانە چاوەڕواننەکراوەکانی. بەدرێژایی ژیانی وەرزشی، لە کۆی ٢٩ یاری، لە ١٩ یاریدا توانی سەرکەوتن بەدەستبهێنێت بە لێدانی TKO/KO یاخود خۆبەدەستەوەدانی یاریزانەکە.

بەناوبانگترین شەڕەکانی

لە ٣ـی ئابی ٢٠١٨، UFC ڕایگەیاند کە نۆرمحەمەدۆڤ یەکەم یاری لە پاڵەوانێتی کێشی سووک دەکات بەرانبەر (کۆنەرمەکگریگۆر) لە ٦ـی تشرینی یەکەم لە لاس ڤێگاس. شەڕەکە دەستی پێکرد و نۆرمحەمەدۆڤ لە دوو قۆناغی یەکەمدا سەرکەوتنی بەدەستهێنا، بەڵام لە قۆناغی سێیەمدا بە مەکگریگۆر دۆڕا. ئەوە یەکەمجار بوو کە نۆرمحەمەدۆڤ لە یارییەکانی UFCـدا لە یەکێک لە قۆناغەکانی یاریەکەدا دۆڕا. لە قۆناغی چوارەمدا توانی لە ڕێگەی خۆبەدەستەوەدان لە مەکگریگۆر بباتەوە. دوای پێشبڕکێکە نۆرمحەمەدۆڤ لە قەفەزەکەوە هەوڵیدا هێرش بکاتە سەر دیلۆن دانیس هاوڕێی مەکگریگۆر بەهۆی جنێودانەوە، کە لە ئەنجامدا شەڕ لە نێوان هەردوو تیمەکەدا دروست بوو. دوای یارییەکەی بەرانبەر ئەو یاریزانە ئێرلەندییە، خەبیب ژمارە پێوانەییەکەی بەرزکردەوە بۆ ٢٧-٠ کە ئەوکات درێژترین بردنەوەی لەسەریەک بوو لە مێژووی UFC. ئەم یارییەی بەنرخی ٢.٤ ملیۆن بینەری بە پارەی هەبوو، کە زۆرترین کڕین بوو یاریەکی لەوشێوەیە.

وازهێنان لە یاریکردن

عەبدولمەناپۆڤیچی باوکی حەبیب لە ٣ـی حوزەیرانی ٢٠٢٠ بەهۆی ڤایرۆسی کۆرۆناوە کۆچی دوایی کرد. ئەمەش بووە هۆکاری وازهێنانی حەبیب نۆرمحەمەدۆڤ لە یاریکردنی زۆرانبازی. لە ٢٤ـی تشرینی یەکەمی ٢٠٢٠ دوای بردنەوەی لە جەستن گەیجی کە ٢٩ـهەمین یاری بوو، بڕیاری وازهێنانی یەکجاری لە یاری زۆرانبازیدا و ڕایگەیاند کە نایەوێت بەبێ باوکی بەژداری پاڵەوانێتییەکان بکات. پاشان سەرۆکی UFC دانا وایت لە ١٩ـی ئازاری ٢٠٢١ ڕایگەیاند کە بڕیاری وازهێنانی نۆرمحەمەدۆڤی قبووڵ کردووە.

تۆماری جەنگی

کۆی یارییەکانی

سەرچاوەکان

1. "'Nurmagomedov has strong claim to be the greatest'". BBC Sport. Retrieved 2 November 2021.
2. "About the club - Eagles MMA". Khabib.com. Retrieved 6 August 2019.
3. "All-Time Lightweight – Fight Matrix". Fight Matrix. Retrieved 27 October 2020.
4. "Khabib Nurmagomedov cleared for UFC 242 after teammates receive reduced suspensions". Yahoo! Sports.
5. "Khabib Nurmagomedov emotional paying tribute to late father during UFC Hall of Fame induction". MMA Fighting. Retrieved 9 July 2022.
6. "Khabib Nurmagomedov enters conversation of MMA's greatest of all time after UFC 254 win and retirement". CBSSports.com. Retrieved 2 November 2021.
7. "Khabib Nurmagomedov makes strong case for UFC's No. 1 pound-for-pound fighter". Yahoo! Sports. Retrieved 2 November 2021.
8. "Khabib Nurmagomedov retires: Undefeated legend leaves UFC the way he promised his father he would — perfect". CBS Sports. Retrieved 11 July 2021.
9. "Khabib Nurmagomedov Trains with BJJ Orange Belt". BJJ Eastern Europe. 10 January 2018.
10. "Rankings". UFC.com. Archived from the original on 28 October 2020. Retrieved 28 October 2020.
11. "The case for Khabib Nurmagomedov as the greatest MMA fighter of all time". www.sportingnews.com. Retrieved 2 November 2021.
12. "Triple Take: Where does Khabib Nurmagomedov rank on the all-time GOAT list?". MMA Junkie. 26 October 2020. Retrieved 2 November 2021.
13. "UFC Judoka Watch: Combatants Putting Judo at the Pinnacle of MMA". www.judoinside.com. Retrieved 3 October 2020.
14. Hamid, Sadek (5 October 2018). "Fighting, faith and politics: The UFC's first Muslim champion". arabi.
15. Khabib Nurmagomedov - Official UFC Fighter Profile". UFC.com. Retrieved 26 September 2016.
16. Lee, Alexander K. (22 October 2020). "The Great Divide: Is Khabib Nurmagomedov the greatest fighter of all-time?". MMA Fighting. Retrieved 2 November 2021.
17. name Reuben Pinder. "Khabib Nurmagomedov seen training in white belt as he begins Jiu-Jitsu training". SportsJOE.ie. Retrieved 15 December 2018.
18. Savoca, Keri (15 January 2019). "You're Pronouncing Khabib Nurmagomedov's Name Wrong". Medium. Retrieved 22 November 2020.
19. UFC fighter rankings: There's a new number one pound-for-pound fighter". Bloody Elbow. 23 March 2021. Retrieved 23 March 2021.