پێغەمبەر و ژیان لەگەڵ باپیریدا

له‌لایه‌ن: نھاد جلال - به‌روار: 2019-08-26-13:28:00 - کۆدی بابەت: 89
 پێغەمبەر و ژیان لەگەڵ باپیریدا

ناوه‌ڕۆك

 ژیان لەگەڵ باپیریدا

پێغەمبەر ئەمجارەیان لەگەڵ باپیریدا ژیان دەباتە سەر ئەو كوڕێكی ژیر و هێدی و لەسەر خۆ بوو، هەمیشە هەوڵی دەدا بە جۆرێك یارمەتی باپیرەی بدات، چونكە باپیرەی پیر و پەككەوتە و بێ‌ توانا بوو، بۆیە بڕیاری دا بچێت بۆ كاری شوانەیی و لە بەرامبەردا پارەی بدەنێ‌ تا خەرجی خۆی و باپیرەی پێ‌ پەیدا بكات. 

 

شوان بوونی پێغەمبەر

ئەو ڕۆژانەی دەچوو بۆ ئیش و شوانیی دەكرد مەڕ و ماڵاتی خەڵكی شاری مەككەی دەلەوەڕاند، ئەمە خواستی خوای گەورەی لەسەر بوو، چونكە كاری شوانیی چەند سوود و ئەزموونێكی هەیە، لەوانە:
1- لە شوانیدا فێری نەترسی و ئازایەتی دەبیت: چونكە لەگەڵ ئەو هەموو ئاژەڵانەدا دەچیت بە دەشت و كێودا و ناترسیت لە ئاژەڵی دڕندە و دز و جەردە و ناحەز و هەوڵ دەدەیت ئاژەڵەكان بە ساغی ببەیت و بهێنیتەوە.
2- هەروەها فێری خۆڕاگری دەبیت: چونكە لە شوانیدا ئاژەڵەكان دێن و دەچن، تۆش دەچیت لەگەڵیاندا و كۆیان دەكەیتەوە و واز ناهێنیت یان ئاژەڵێك نەخۆش دەكەوێت یان دوور دەكەوێتەوە یان لاسارە كەچی شوانەكە خۆڕاگرە.
3- فێری سۆز و میهرەبانی دەبیت: چونكە تۆ پارێزگاری لە ئاژەڵەكان دەكەیت و خۆشت دەوێن و لە زیان و نەخۆشی و شتدا ئاگاداریان دەبیت، ئەی دەبێت چەندە مرۆڤەكانت خۆش بوێت؟! دەبێت ببیتە مایەی كامەرانی مرۆڤەكان.
4- لە شوانیەوە فێر دەبیت خۆت نان و خۆراكی خۆت بەدەست بهێنیت، لای خەڵك داوا نەكەیت، بەڵكو بتوانیت ئیش بكەیت و بەرهەم بهێنیت، چونكە هەر كەسە و شتێكی كەم بەرهەم بهێنێت، بە هەموویانەوە شتێكی زۆریان دەبێت.
5- هەرچی پێغەمبەرانی تریش هەن كاری شوانیان كردووە، بۆیە پێغەمبەریش(د.خ) كە كۆتایی پێغەمبەرانە دەبێت ئەو ئیشە بكات. 


سەرچاوەکان

254 بینین