ناوه‌ڕۆك
ناساندن
زانکۆی کوینزلاند (بە ئینگلیزی: The University Of Queensland)، زانکۆیەکی توێژینەوەی گشتییە کە دەکەوێتە شاری بریسبنی پایتەختی ویلایەتی کوینزلاند، بە دووەم باشترین و بەناوبانگترین زانکۆ دادەنرێت لە سەرانسەری ئوستراڵیادا، لە ساڵی ١٩٠٩ لەلایەن پەرلەمانی کوینزلاندەوە بڕیار بۆ دروستکردنی دەرچووە و لە ساڵی ١٩١١ تەواوکراوە و خوێندن تیایدا دەستیپێکردووە، کەمپ و دامەزراوەکانی زانکۆکە بە سەرانسەری ویلایەتی کوینزلاند و دەرەوەی ویلایەتەکەدا بڵاوبوونەوەتەوە، سەرەتا چەند بەشێکی دیاریکراو لە زانکۆکەدا هەبوون کە بریتی بوون لە بەشی بیرکاری، فیزیا، کیمیا، ئەندازیاری و مێژوو، لە ئێستادا زانکۆکە لە دە کۆلێج و شەش فاکەڵت پێکهاتووە، زانکۆکە دوو مۆزەخانەی تێدایە کە یەکێکیان هونەرییە و لە ساڵی ١٩٧٦ بنیادنراوە، مۆزەخانەی ئاڕ دی میلنس کە لە ساڵی ١٩٦٣ بنیادنراوە، هەروەها زانکۆکە خاوەنی کتێبخانەیەکی گەورەیە کە لە ساڵی ١٩١٠ دامەزراوە و لە ١١ لقی سەرەکی پێکهاتووە، زانکۆی کوینزلاند ئەندامی دامەزرێنەری کۆمەڵەی" EDX "ـە و ئەندامی پێشەنگی گروپی Group Of Eightـە و ئەندامی کۆمەڵەی لێکۆڵینەوەی نێودەوڵەتی زانکۆی "پاسیفیک ڕایم"ـە، زانکۆی کوینزلاند لەلایەن کۆلێج و بەشەکانییەوە بڕوانامەی ماستەر، بەکالۆریۆس و دکتۆرا دەبەخشێت بە خوێندکارەکانی، هەروەها زانکۆکە براوەی دوو خەڵاتی نۆبڵە.
کۆلێجەکانی زانکۆی کوینزلاند
زانکۆی کوینزلاند لە دە کۆلێج پێکدێت کە دیارترینیان ئەمانەن:
- کۆلێجی کڕۆم وێڵ: ئەم کۆلێجە لە ساڵی ١٩٥٠ دامەزراوە و لە پێنج باڵەخانە پێکهاتووە، سەرەتا کۆلێجەکە تەنها تایبەت بوو بە خوێندکارانی ڕەگەزی نێر بەڵام دواتر لە ساڵی ١٩٧٣ خوێندکارانی ڕەگەزی مێ توانییان بەشداربن و بخوێنن.
- کۆلێجی دەچسن: ئەم کۆلێجە لە ساڵی ١٩٣٧ دامەزراوە و یەکێکە لە ئەو کۆلێجانەی کە تەنها تایبەتە بە خانمان و ساڵانە بە نزیکەیی ٢١٠ خوێندکار تێیدا دەخوێنن.
- کۆلێجی ئیمانوێڵ: کۆلێجێکی پەروەردەیی تێکەڵاوە و لە ساڵی ١٩١١ دامەزراوە و ساڵانە نزیکەی ٣٤٠ قوتابی تێیدا دەخوێنن.
- کۆلێجی گرەیس: ئەم کۆلێجە تەنها تایبەتە بە ئافرەتان و لە ساڵی ١٩٧٠ دامەزراوە و ساڵانە نزیکەی ١٨١ قوتابی تێیدا دەخوێنن.
- کۆلێجی کینگ: کۆلێجێکی تێکەڵاوە و ساڵانە نزیکەی ٣٢٠ خوێندکاری کوڕ و کچ تێیدا دەخوێنن.
- کۆلێجی ئێس تی جۆن: کۆلێجێکی پەروەردەیی تێکەڵاوە و لە ساڵی ١٩١١ لەلایەن قەشەیەکی خەڵکی ویلایەتی بریسبنەوە دامەزراوە.
- کۆلێجی ئێس تی لیۆ: ئەم کۆلێجە تەنها تایبەتە بە خوێندکارانی ڕەگەزی نێر و مێژووی دروستکردنی دەگەڕێتەوە بۆ سەردەمی قەشەیەکی کاسۆلیکی ڕۆمانی کە لە ویلایەتی بریسبن نیشتەجێ بوو.
- کۆلێجی ئافرەتان: کۆلێجێکە کە تەنها تایبەتە بە خوێندکارانی ڕەگەزی مێ.
پسپۆڕییەکانی زانکۆی کوینزلاند
زانکۆی کوینزلاند چەندین پسپۆڕی جیاواز لەخۆدەگرێت لەوانەش:
- مێژوو
- فەلسەفە
- زانستە مرۆڤایەتییەکان
- هونەرە جوانەکان
- ئەدەب
- فیزیا
- زمانەکان
- میدیا (ڕاگەیاندن)
- مۆسیقا
- ڕامیاری
- کیمیا
- کۆمەڵناسی
- ژمێریاری
- ئەندازیاری
- دارایی
- بیرکاری
بەناوبانگترین دەرچووەکانی زانکۆی کوینزلاند
زانکۆی کوینزلاند لە سەرەتای دامەزراندنییەوە تا ئەمڕۆ ژمارەیەکی زۆر دەرچووی هەبووە لە گشت بەشە جیاوازەکان و خوێندکارەکان بوونەتە کەسانی بەناوبانگی ئوسترالیا و دەرەوەی ئوسترالیا، وەک:
- چارلز ئەیبڵ: جیگری سەروەزیرانی غینیای نوێ.
- مایکڵ جۆن ئەهێرن: سەروەزیرانی پێشووی کوینزلاند لە ماوەی ساڵانی ١٩٨٧ بۆ ١٩٨٩.
- جولیان ڕۆی: سەرۆکی ئەنجومەنی ئابووری ئوسترالیا و بەڕێوبەری جێبەجێکاری پێشوو و بەڕێوبەری فڕۆکەخانەی بریسبن.
- پیتەر ئارنسۆن: پارێزگاری پێشووی ویلایەتی کوینزلاند لە ماوەی ساڵانی ١٩٩٧ بۆ ٢٠٠٣.
- ڕیک باتێلینۆ: جێگری پارێزگاری بانکی یەدەگی ئوسترالی بۆ ماوەی ساڵانی ٢٠٠٧ بۆ ٢٠١٢.
- دامی کوینتن برایس: یەکەم پارێزگاری ژن لە ئوسترالیا.
- ماکس لو: ئەندامی ئەنجومەنی سەروەزیرانی بەریتانیا بۆ زانست و تەکنەلۆژیا.
- جیۆفری ڕوش: براوەی خەڵاتی ئۆسکار و خەڵاتی ئێمی.
