ناوه‌ڕۆك
مامۆستای سەرکەوتوو کەسێکی داهێنان کارە
دیاردەیەکی زۆر نەخوازراو لە ناو زۆربەی مامۆستایان بەدی دەکرێت، ئەویش ئەوەیە مامۆستا لە سەرەتای دەست بەکاربوونی تاوەکو ساڵانیکی زۆر بە یەک ڕێچکە و بە یەک شێوە وانەکانی خۆی دەڵێتەوە، تا وای لێدێت قوتابیان دەزانن مامۆستا چۆن دێتە ژوورەوە و چی دەڵێت و چۆن جوڵە دەکات، ئەوەش دەگەڕێتەوە بۆ ئەوەی کە مامۆستا ساڵانە کارەکەی خۆی هەڵناسەنگێنێ و لایەنە باش و خراپەکانی خۆی دیاری ناکات، بەمانایەکی تر کەسە لە تەمەنی پیشەکەیدا لەسەر یەک شیواز دەڕوات و هەرگیز بیر لە داهێنان بۆ وانە کوتنەوە و گەڵس و کەوتی خۆی ناکاتەوە، ئەمەش بەرەو لاوازی دەبات و کەلێنێکی گەورە لە کەسایەتی ئەو کەسە دروست دەبێت. هەندی کەس وا دەبینن کە داهێنان کاری شتێکی خۆڕسکە و مرۆڤ لەگەڵ لە دایک بوونی ئەم توانایەی هەیە، بەڵام ئەمە بۆچونێکی هەڵەیە، چونکە هەموو کەسێک دەتوانێت زیرەک و داهێنان کاربێت، ئەگەر خۆی بیەوێت.کەواتە داهێنانکاری لە چەند کەسێک کۆنەبۆتەوە، هەموومان دەتوانین داهێنانکار بین، دەتوانین شتێک بکەین کە کەسی تر نەیکردبێت، بابەتی نوێ بهێنینە بوونەوە.
