ناوه‌ڕۆك
کۆمەڵ
کۆمەڵی دادگەری یەکێکە لە حیزبە سەرەکییەکانی هەرێمی کوردستان و لە ٣١/٥/٢٠٠١ دروستبووە، لە سەرەتای درووستبوونی هەتاوەکو ١٩/٢/٢٠٢١ ناوی کۆمەڵی ئیسلامی کوردستان بووە، بەڵام لە کۆنگرەی چوارەمی حیزبەکە ناوەکەی گۆڕدرا بە کۆمەڵی دادگەری، سەرۆکی حیزبەکە عەلی باپیرە و پەیڕەوی پڕۆگرامی سوننەی ئیسلامی دەکات.
حیزبەکە و سەرۆک و ئەندامەکانی پێشووتر لەنێو حیزبی بزووتنەوەی ئیسلامی کوردستاندا بوون بەڵام لە ئایاری ٢٠٠١ بەهۆی ناکۆکی لە بیرکردنەوە عەلی باپیر جیابوونەوەی خۆی ڕاگەیاند.
لە کۆتا هەڵبژاردنی ٢٠١٨ بۆ ئەنجوومەنی نوێنەرانی عێراق خاوەنی ٣ کورسیە لە کۆی ٣٢٨ کورسی، لە پەرلەمانی کوردستانیش خاوەنی حەوت کورسییە لە کۆی ١١١ کورسی.
مووشه‌كبارانكرانی بنكه و باره‌گاكانی كۆمه‌ڵی ئیسلامیی له‌لایه‌ن ئه‌مه‌ریكاوه
لە شه‌وی 20 /21ی 3ی (2003)دا بنكەو بارەگاكانی كۆمەڵ لە شارەزوور و هەورامان لەلایەن ئەمریكاوە مووشەكباران دەكرێن و، لە ئاكامدا نزیک لە (100) كەسێكیان لە ئەندام و كادیر و پێشمەرگە لێ کوژراو و بریندار دەبن، سەرەنجام بەپێی ڕێككەوتنێك لەگەڵ یەکێتیدا، بنكە و بارەگاكانیان دەگوازنەوە بۆ ناوچەی پشدەر.
کۆنگرەی چوار
لە چوارەم کۆنگرەی حیزب ناوی حیزبەکە بە پێشنیاری سەرۆکی حیزبەکە لە کۆمەڵی ئیسلامییەوە گۆڕدرا بۆ کۆمەڵی دادگەری و پاشگری ئیسلامی لێ لێکرایەوە بۆ کرانەوەی زیاتری حیزبەکە بە ڕووی خەڵکدا و هاتنەنەوەوەی کەسانی نائیسلامی، دواتریش ئاڵای حیزبەکەش گۆڕا بەڵام هەر بە ڕەنگی پڕتەقاڵی مایەوە، پۆستی سەرۆکی حیزبیش لە ئەمیرەوە گۆڕا بۆ سەرۆک، لەم کۆنگرەیە دووبارە عەلی باپیر بە سەرۆکی کۆمەڵ هەڵبژێردرایەوە و ٢٢ کەس وەک ئەندامی سەرکردایەتی هەڵبژێردران کە سێ کەسیان ئافرەتن.
مێژووی حیزب
بزووتنەوەی یەكبوونی ئیسلامی
لە (1/8/1998) مەكتەبی سیاسی بزووتنەوەی ئیسلامی لە كوردستان / عێراق، پڕۆژەی یەكخستنی كاری ئیسلامی و یەكبوونی مسوڵمانان (وحدە العمل الإسلامی وتوحید المسلمین)ی خستەڕوو.
وە لە (10 / شەعبان / 1419 كۆچی - 29/11/1998 زایینی) لیژنەی باڵای هاوكاری بزووتنەوەی ئیسلامی و بزووتنەوەی ڕاپەڕینی ئیسلامی كۆبوونەوەی یەكەمی لە شاری سلێمانی بەست و، لە (10/ جەمادی یەكەم / 1420 ك – 21 / 8 / 1999 ز) یەكەم بەیاننامەی مەكتەبی سیاسی (بزووتنەوەی یەكبوونی ئیسلامی لە كوردستان / عێراق) بڵاوكرایەوەو حیزبە نوێیەكە ڕاگەیەنرا و، هەمان ڕۆژ یەكەم ژمارەی ڕۆژنامەی (ڕێگای یەكبوون)ی زمانحاڵی حیزب بڵاوكرایەوەو، مامۆستا عەلی عەبدولعەزیز محەمەد وه‌ك (ڕابەری گشتی) دیاری كرا. مەكتەبی سیاسی پێكهاتبوو لە (16) ئەندام و، سەركردایەتی لە (52) ئەندام پێكهاتبوو.
لە ڕۆژانی (6 – 12 / جەمادی یەكەم / 1421 ك) بەرانبەر (6 – 12 / 8 / 2000 ز) یەكەم و تاكە كۆنگرەی بزووتنەوەی یەكبوونی ئیسلامی لە شاری هەڵەبجە بە ئامادەبوونی (860) ئەندام دەستی بەكارەكانی كرد و، لە شارۆچكەی (تەوێلە) كۆنگرە بەردەوامی بە كارەكانی دا تا كۆتایی و، (29) كەس بۆ ئەندامی سەركردایەتی دەرچوون.
پاش كۆتاییهاتنی كارەكانی كۆنگرە، لە (13/8/2000) لیژنەی باڵای ئامادەكاری كۆنگرە ڕاگەیاندنی كۆتایی بە واژووی هەر شەش ئەندامەكەی ڕایگەیاند و هەموو ئەندامانی لیژنە ئیمزایان كرد كە كۆنگرە بەسەركەوتوویی كۆتایی هات، بەڵام بەڕێز ڕابەری گشتی بە ئەنجامەكەی ڕازی نەبوو و ئامادە نەبوو پەسەندی بكات و سوور بوو لەسەر هەڵوەشاندنەوەی ئەو ئەنجامە. تا سەرەنجام دوای نزیكەی نۆ (9) مانگ، بزووتنەوەی یەكبوون بەهۆی كۆمەڵێك گرفتی ناوخۆییەوە هەڵوەشایەوەو، چەند حیزب و لایەنێكی لێ كەوتەوە.
بەیاننامەی ڕاگەیاندنی كۆمەڵی ئیسلامیی لە كوردستان / عێراق
لە پشت سەرهەڵدانی هەر حیزب و ڕێكخراوێك لە هەر شوێنكات و بارودۆخێكدا، كۆمەڵێك هۆكار خۆیان حەشارداوەو دەبنە هۆكاری هاتنە ئارای ئەو حیزب یان ڕێكخراوە.
دوای ئەوەی كۆنگرەی بزووتنەوەی یەكبوونی ئیسلامیی ئەنجامدرا و، دەرەنجامەكانی لەلایەن بەڕێز ڕابەری گشتییەوە قبوڵ نەكرا و ئامادە نەبوو واژووی بكات، پاش هەوڵێكی زۆر بۆ گەیشتن بە ئەنجامێك و بێ ئاكام بوونی هەموو هەوڵەكان، لە سۆنگەی ئەوەوە كە (سەركردایەتی هەڵبژێردراو)ی كۆنگرەی یەكەمی بزووتنەوەی یەكبوونی ئیسلامی (كە تاكە كۆنگرەی ئەو حیزبەیە) متمانەی ئەندامان و كادیرانی حیزب پاڵشتە بۆی و، لە هەموو كەس زیاتر مافی ئەوەی هەیە نەخۆشیەكان دیاری بكات و دەرمان و چارەسەریشیان بۆ دابنێ، زۆربەی ئەندامانی سەركردایەتیی دەرچووی كۆنگرەی یەكەمی بزووتنەوەی یەكبوون كە ژمارەیان (17) كەس بوو لە كۆی (29) كەس، ناوی حیزبەكەیان گۆڕی بۆ (كۆمەڵی ئیسلامیی لە كوردستان / عێراق) و، بەڕێز مامۆستا (عەلی باپیر) یان وەك ئەمیری كۆمەڵ هەڵبژارد و، ڕۆژی (8ی ربیع اڵاول 1422 ك – 31/5/2001 ز) بەناوی (ئەنجومەنی شورای كۆمەڵی ئیسلامیی لە كوردستان / عێراق) حیزبە نوێیەكەیان بە بڵاوكردنەوەی بەیاننامەی ئیعلانكردن ڕاگەیاند، ئەوەیان ڕاگەیاند كە كۆمەڵی ئیسلامیی خۆی بە درێژەپێدەری ڕاستەقینەی بزووتنەوەی یەكبوونی ئیسلامیی دەزانێت.
تەوەرەكانی بەیاننامەكە ئەمانە بوون: (هۆكارەكانی ئیعلانكردنی كۆمەڵ، هۆكاری گۆڕینی ناوی حیزبە نوێیەكە، مەبەستی ئیعلانكردنی حیزبەكە، داوای دەستبارگرتن، چەند هێڵێكی گشتی سیاسەتی كۆمەڵ)
بەیاننامەکە
بەیاننامەی ئیعلانكردنی كۆمەڵی ئیسلامیی لە كوردستان / عێراق
بسم الله الرحمن الرحیم
جەماوەری مسوڵمانی كوردستان
حزب و لایەنە سیاسییەكان
پێشمەرگە و ئەندام و كادیرە دڵسۆزەكانی رابوونی ئیسلامی
لای هەمووان ئاشكرایە كە پاش بەستنی یەكەمین كۆنگرەی بزووتنەوەی یەكبوونی ئیسلامی، هەرچەندە هەموو لایەك بەڵێنی پابەند بوونیان بە ئەنجامەكانی دابوو، بەڵام لەبەر كۆمەڵە هۆكارێك كە حەزناكەین بیانخەینە ڕوو و لای زۆربەی خەڵكیش زانراوە، نەتوانرا ئەنجامەكەی كۆنگرە بەڕەسمی لەلایەن بزوتنەوەی یەكبوونەوە ڕابگەیەنرێن.
ئیدی لەو ڕۆژەوە (11/8/2000) تا ئەمڕۆ بزووتنەوەكەمان گیرۆدەی قەیرانێكی گەورە بووەو، ڕۆژ لەدوای ڕۆژیش بەرەو پووكانەوە دەچێ و، ئەندام و موجاهیدەكانیشمان دووچاری بێزاریی و نائومێدیی و بێ متمانەیی زیاتر دەبن.
جا هەر چەندە ئێمە ئەوەندەی گونجا هەوڵا و تەقەللامان دا كە قەیرانەكە چارەسەر بكەین و بزووتنەوەكەمان بخەینەوە سەر ڕەوڕەوەی ئاسایی خۆی، لەو پێناوەشدا نەرمكێشیی زۆرمان كرد بە ڕاددەیەك كە بووینە جێی گلەیی و ڕەخنەی زۆرێك لە برایانمان، بەڵام سەرەنجام هەوڵا و تەقەللا و دابەزین (تنازل) و نەرمكێشییەكەمان بێ سوود بوو و، هۆكاریش ئاشكرا و ڕوونە و بە پەسەندی نازانین باسی بكەین.
بۆیە دوای بە بنبەستن گەیشتنی هەوڵەكانی ئاشتەوایی (صلح) و گەیشتنەوە یەك، پاش ڕاوێژ و ڕاپرسی كردن بە ئەندام و موجاهیدە بەڕێز و دڵسۆزەكانمان هاتینە سەر ئەو ڕایە كە خۆمان و ئەندام و موجاهیدانی هاوڕامان جگە لە كۆبوونەوەو بوونی خۆ ئیعلانكردن لە كۆمەڵێكی سەربەخۆدا، هیچ ڕێی ترمان لەبەردەمدا نییە، بۆ ئەوەی بتوانین كە لەسەر بناغەی بنەما شەرعییەكان و بەگوێرەی بەرنامەیەكی رێك و ڕاست و بە بەرچاوڕۆشنییەوە درێژە بە كار و جیهادی ئیسلامییانەمان بدەین و، بە سەركردایەتییەكی تازە و ئومێد و هیوایەكی زیاتر و گوڕ و تینێكی چاكترەوە – خوا پشتیوان بێت – دەست بەكار بووین.
لە سۆنگەی ئەوەوە كە نێوەڕۆك لەپێش ناوەوەیەو بۆ خۆپاراستنیش لە هەندێك گرفت، بەچاكمان زانی ناوی بزوتنەوەكەمان بگۆڕین بۆ (كۆمەڵی ئیسلامی لە كوردستان / عێراق) كە بێگومان درێژەپێدەری كار و جیهادی بزوتنەوەی یەكبوونی ئیسلامییە و خوا پشتیوان بێت پارێزەری بەرهەمی خوێنی شەهیدە سەربەرزەكانی و كۆچ و كۆچبار و گرفتاریی و ناڕەحەتی و جوامێری ئەندام و موجاهیدە فیداكارەكانیەتی.
جا لێرەوە بەپێویستی دەزانین كە ڕووبكەینە برا و خوشكەكانمان و دڵنیایان بكەین كە مەبەستمان لەم كارە تەنها ڕەزامەندیی خواو بەندایەتی راست و دروست كردن بۆ خوا و دینداریی مسوڵمانەتی كردنێكی بێ خڵتە و خاڵە. بۆیە داوایان لێ دەكەین دەستبارمان لەگەڵا بگرن با هەموومان لەدەوری ئاڵا شەكاوەكەی (لا إله إلا الله محمد رسول الله) كۆببینەوەو، خوا یار بێت دەست بەكار بین بۆ خۆ و خەڵك و میللەت پەروەردە كردن لەسەر بناغەی عەقیدەیەكی راست و خواپەرستییەكی ساغ و رەوشت و ئاكارێكی بەرز و پەسەند و، بەكارهێنانی هەر هۆكارێكی شەرعیی كە بۆمان مەیسەر بێت بۆ گۆڕین و پاكسازیی و چاكسازیی كۆمەڵگاكەمان و بەرپاكردنی شەریعەتی خوا لە سەرتاپای ژیان و گوزەرانیدا و خزمەتكردنی نیشتمان و گەلە مسوڵمانەكەمان.
بەڕێزان!
ئێمە وەك كۆمەڵی ئیسلامی بڕوامان بە هاوكاریی و برایەتی تەواو هەیە لەگەڵا تێكڕای مسوڵماناندا بەگشتی و زانا و پێشەوایان و لایەن و تەوژمە ئیسلامییەكان بەتایبەت.
هەروەها بڕوامان بە پێكەوە ژیان و تەبایی و هاوكاری هەیە لەگەڵا لایەنە سیاسیەكاندا بۆ خزمەتكردنی میللەتی كوردستان و پاراستنی ئەزموون و قەوارەكەی.
پاراستنی بەرژەوەندی و مافە ڕەوایەكانی وڵاتانی دراوسێشمان بە ئەركێكی سەرشانمان دادەنێین.
والسلام علیكم ورحمە الله
ئەنجومەنی شوورای كۆمەڵی ئیسلامی لە كوردستان / عێراق
/ 7ربیع اڵاول / 1422 كۆچی بەرانبەر 30/5/2001 زایینی
وەك لە ناوونیشانی بەیاننامەكەدا دەردەكەوێت، ئەو مێژووە (31/5/2001) هی ڕاگەیاندنی كۆمەڵی ئیسلامییە.
سەرپێبوونی كۆمەڵ
دوای ڕاگەیاندنی كۆمەڵی ئیسلامیی، هەندێك وایان لێكدایەوە كە بەهۆی لێكچوونی ناوەكانیان، كۆمەڵی ئیسلامیی لە كوردستان / عێراق درێژەپێدانی خەباتی هەندێك حزبی دیكەی ئیسلامیی بێت لە وڵاتان، وەك كۆمەڵی ئیسلامیی لە (كشمیر، پاكستان، بەنگلادیش، میسر، لیبیا). بەڵام لە ڕاستیدا كۆمەڵی ئیسلامیی درێژەپێدانی خەباتی هیچ حزبێكی دەرەوەی كوردستانی باشوور (عێراق) نییە و، لە ژێر سەرپەرشتی و ئامۆژگاری (وصایە)ی هیچ حیزب و لایەنێكی دەرەكی و ناوخۆیی نییە. حیزبێكی سەربەخۆیە لە شێوازی بیركردنەوە و بەرنامەی كار و ڕەفتاردا و، بە دەست و ئیرادەی سەركردە و كادیرانی ڕاگەیەنرا. ناو تاپۆ نییە لەسەر هیچ لایەنیكی ئیسلامیی یان نا ئیسلامیی، چەندین حیزبی دیكەی چەپ و عەلمانی و نەتەوەیی وێكچوو لە ناودا لە نێو لایەنە جیاوازەكان لە وڵاتی جیاوازدا هەن و گرفتیش نییە. ئەوەی پاڵنەری سەرەكی هەڵبژاردنی ئەم ناوە بوو، بوونی وشەی (الجماعە) بوو لە چەندین دەقی فەرموودە .
