به‌وری به‌یان له ‌گێتی زینده‌وه‌ردا

له‌لایه‌ن: عه‌لادين سجادی - به‌روار: 2020-12-03-23:36:00 - کۆدی بابەت: 578
به‌وری به‌یان له ‌گێتی زینده‌وه‌ردا

ناوه‌ڕۆك

ده‌رباره‌ی گێتی زینده‌وه‌ر 

په‌رتوكی " گێتی زینده‌وه‌ر " یه‌كێكی دیكه‌ له‌ شاكار و نووسراوه‌كانی نووسه‌ر و زانای گه‌وره‌ی كورد ( عه‌لادین سه‌جادی )یه‌ ، كتێبی گێتی زینده‌وه‌ر كتێبێكه‌ دنیایه‌كی سه‌ربه‌خۆی گرتووه‌ له‌ باره‌ی گیانله‌به‌ران ، دار و دره‌خت ، كه‌ڵك و نرخیانه‌وه‌ ، هۆش و بیریانه‌وه‌ ، چۆنیه‌تی ژینیانه‌وه‌ ، ئه‌و شتانه‌ تیایانا هه‌ن ، ئه‌و به‌رهه‌مانه‌ی كه‌ ئه‌یده‌ن ، ئه‌و كارانه كه‌ ئه‌یكه‌ن ، ئه‌و سروشتانه‌ كه‌ هه‌ر هه‌ن .

ناساندن

به‌وری به‌یان گیانله‌به‌رێكه‌ زۆرتر له‌هینددا ئه‌بێت ، له‌گه‌ڵ شێردا دوژمنی یه‌كن ، ئه‌گه‌ر به‌وری به‌یان و پڵنگ بوو به‌شه‌ڕیان شێر ئه‌داته‌ پاڵ پڵنگ ، به‌وری به‌یان له‌شكڵ دا له‌شێرێكی گه‌وره‌ ئه‌كا . به‌وری به‌یان و دووپشك ئاشنایه‌تییان زۆر خۆشه‌ ، به‌وری به‌یان كه‌نه‌خۆش كه‌وت شه‌ك ئه‌خوا چاك ئه‌بێته‌وه‌ ، كه‌پیر بوو ئیتر توخنی ئینسان ناكه‌وێت ، كه‌متیار فێره‌ به‌خواردنی بێچوی به‌وری به‌یان . به‌وری به‌یان مێیه‌كه‌شی به با سگی پڕ ئه‌بێت ، له‌به‌رئه‌مه‌یه‌ بۆیه‌ وه‌كوو با ئه‌ڕوا . به‌وری به‌یان ناگیرێ مه‌گه‌ر به‌فێڵ نه‌بێت ، ئه‌ویش ڕاوچی خۆی لێ دائه‌گرێ بێچوه‌كانی لێ ئه‌دزێ و هه‌ریه‌كه‌ی ئه‌خاته‌ ناو شوشه‌یه‌كه‌وه‌و سورای ووڵاغێكی تیژڕه‌و ئه‌بێ و ئه‌ڕوا ، ئه‌گه‌ر دایكه‌كه‌ نه‌هات به‌ شوێنیا ئه‌وا ڕۆیشتوه‌و بێچوه‌كانی بردوه‌ ، ئه‌گه‌ر خۆتا ئه‌م كابرا له‌شوێنی خه‌ته‌ر ده‌رئه‌چێ دایكه‌كه‌ گه‌ڕایه‌وه‌ بۆ شوێنی خۆی و سه‌یری كرد بێچوی نه‌ماوه‌ به‌ بۆن شوێنیان هه‌ڵئه‌گرێ و ئه‌چێ به‌شوێن كابرادا و ئه‌یگاتێ ، كابرا كه‌زانی واهات یه‌كێ له‌بێچوه‌كانی به‌ شووشه‌كه‌وه‌ بۆ فڕی ئه‌دات ، دایكه‌كه‌ بۆ ڕزگاركردنی ئه‌و بێچووه‌ له‌ناو شووشه‌كه‌دا و ئه‌وانیتری له‌بیر ئه‌چێته‌وه‌ ، كابرا بۆ خۆی به‌ بێچوه‌كانی تره‌وه‌ هه‌ڵدێت .

به‌وری به‌یان له‌گه‌ڵ مناڵی ماڵاندا زۆر باش ڕێ ئه‌كه‌وێ ، داری كافووری زۆر خۆش لێدێت . هه‌ركه‌س قوله‌پێ به‌وری به‌یان ببه‌ستێ به‌قاچ یان به‌ده‌ستییه‌وه‌ قه‌ت قه‌ت له‌ڕێگا ڕۆشتن و ئیش كردن ماندوو نابێت . هیچ حه‌یوانێك له‌ڕاكردندا ناگاته‌ به‌وری به‌یان ، ڕۆیشتنی وه‌كوو با وایه ،‌ ته‌مه‌نیشی درێژه‌ ، به‌چه‌پۆكه‌كانیشی ده‌ڕوات .


سەرچاوەکان

224 بینین