ناوه‌ڕۆك
دیاری بۆ کچێک
بەگشتی شت کڕین بۆ منداڵان بەرامبەر بە گەنجان زۆر ئاسانترە، منداڵ هەموو دیارییەکی بەدڵە چونکە سەلیقەیەکی وایان نییە، بەڵام گەنجان جیاوازن و بەتایبەت کچان لێرەدا باسی هەندێک دیاری تایبەت دەکەین بۆ کچان.
١- گوڵ و گوڵدان:
گوڵدانێکی بچوک و جوان دیارییەکی جوانە بۆ کچێکی گەنج، دەتوانیت زوتر گوڵێکی تێدا بڕوێنیت و بەدیاری بۆی ببەیت و پێی بڵێیت چۆن ئاگاداری بێت.
٢- گوارەی جوان:
کچان حەزێکی زۆریان هەیە بۆ ئێکسسوارات، گوارەش شتێکی تایبەت و ناسکە دەتوانیت جگە لە کڕینی گوارەی دەستیشی بەدەست خۆت بۆ دروست بکەیت.
٣- کەڤەری موبایل:
کچان بەگشتی عاشقی شتی جوان و ڕازاندنەوە و باق و بریقن، هەر بۆیە کەڤەرێکی نەخشێنراو و جوان و نقێمداڕ دەتوانێت رۆر دڵی کچێک خۆش بکات.
٤- سپیکەری دژە ئاو:
کام کچی گەنج هەیە کە حەزی لە گۆرانی و مۆسیقا نەبێت؟
سپیكەری بلوتوس کە تەڕ نەبێت و دژە ئاو بێت دیاریەکی زۆر جوانە بۆ کچان، دەتوانن هەموو ئەو گۆرانیانەی کە حەزیان لێیەتی تێیدا خەزنی بکەن و هەرکات ویستیان گوێی لێ بگرن.
٥- کامێرای وێنەی خێرا:
یەکێکی تر لە دیاریەکان بریتییە لەم جۆرە کامێرایە، دەتوانن بەمە وێنە بگرن و خێرا وێنەکەیان دەست کەوێتەوە.
٦- پەرتووک بە بابەتی هەستیار و جوانەوە:
بۆ هاندانی کچێکی گەنج بۆ خوێندنەوە، پەرتووکیان وەک دیاری بدەنێ کە لەگەڵ دەروونیان بگونجێت.
٧- کۆڵەپشت:
زۆرینەی گەنجان لاپتۆپ و ئایپادیان هەیە بۆیە جانتایەکی کۆڵەپشت بە ڕەنگی پەمەیی بۆ هەڵگرتنی ئەم شتانە دەتوانێت دیاریەکی زۆر جوان بێت.
٨- ئامێرەکانی مۆسیقا نموونە (گیتار):
گیتار یاخود هەر ئالەتێکی تری مۆسیقا دیاریەکی جوانە بۆ هەر گەنجێک، بەتایبەت گەنجێک حەزی هونەری هەبێت یارمەتی دەدات خۆی فێر بکات و کاتی بۆ تەرخان بکات.
٩- کەلوپەلی چێشت لێنان:
زۆرێک لە کچان حەزی زۆریان هەیە بۆ چێشت لێنان، بەتایبەت کاتێک گەورەتر دەبن و حەزدەکەن لە چێشت لێناندا لاسایی گەورەکان بکەنەوه، کۆمەڵێک کەلوپەلی چێشتخانە کە تاقم بێت وەک (دەستگیر، بەروانکە، کەوگیر، هتد...) دیاریەکی زۆر جوانە.
١٠- لەمەعی لێو:
لەمەعی لێو بە هەموو تامی میوەکان هەیە و ڕەنگی نییە و بۆ هەموو تەمەنێک دەبێت و بۆیە پێویست ناکات دڵگران بیت لەبارەی نەگونجانی ڕەنگەکەیەوە، دەتوانن سوودی لێوەرگرن بۆ وشکبوونەوەی لێویان لەڕۆژانی سارددا.
١١- هێدفۆن:
زۆرینەی گەنجان زۆر حەزیان لە گوێگرتن بۆ مۆسیقایە، هەربۆیە هێدفۆنێکی جوان بەڕەنگێکی کچانەوە دیارییەکی جوانە بۆ هەر کچێک.
١٢- کەلوپەلی کاری دەستی:
بە دیاری کردنی هەندێک شلیلە و دەزووی ڕەنگا ڕەنگ دەتوانیت یارمەتیدەر بیت تاکوو کچێک فێری چنین و دەستڕەنگینی ببێت و زۆرێک لە کچان حەزیان لەم کارەیە و ئەمەش دەتوانێت دیاریەکی تایبەت بێت.
١٣- چاویلکە:
یەکێکی تر لە دیاریەکان بریتییە لە چاویلکەی بەر تیشکی خۆر، تەنانەت ئەگەر چاویلکەی زۆریشی هەبێت هێشتا چاویلکەیەک دەتوانێت ببێتە دیاریەکی زۆر دڵخۆشکەر بۆ کچێک.
١٤- ئاڵتوون:
بەگشتی ئاڵتوون یەکێکە لە شتە جوانەکان بەلای کچانەوە، هەر بۆیە زنجیرێکی ناسکی ئاڵتوونی بە پیتی خۆی یاخود مەدالیایەکی زۆر ناسک زۆر گرانبەها و نایابە بۆ کچێک، نەک زەرد دەتوانیت ئاڵتوونی سپی یاخود تەنانەت ڕەنگی تری بۆ هەڵبژێریت.
١٥- تەوقه:
کچان چەند تەوقە و مەتاتی قژیان هەبێت، هێشتاش هەر کەمیان هەیە، کۆمەڵێک تەوقەی ڕەنگاو ڕەنگ شتێکی زۆر جوانە وەک دیاری بدرێت بە کچێک.
١٦- دەفتەری یادگاری:
نوسینی یادگاری ڕۆژانە بۆ مێشک و ئاسوودەییت زۆر سوودی هەیە، دەفتەری یادگاری دیارییەکی زۆر جوانە بۆ کچێک بە ڕەنگێکی کچانەوە کە حەزدەکەن هەموو ڕۆژە خۆش و ناخۆشەکانیانی تێدا بنووسنەوە.
١٧- بۆیەی نینۆک:
کچان عاشقی بۆیەی نینۆکن، کۆمەڵێکی باش و ڕانگی جیاواز لە بۆیەی نینۆک دەکرێت دیاریەکی زۆر جوان بێت.
