ناوه‌ڕۆك
ناساندن
بنکەی ڕووناکبیری گەلاوێژ (بە ئینگلیزی: Galawezh Cultural Center) بنکەیەکی ئەدەبیی ڕۆشنبیرییە کە لە ساڵی ١٩٩٦ زایینی لە شاری سلێمانی دامەزراوە. ئەم بنکەیە ساڵانە فێستیڤالێکی ئەدەبی و کولتووری بەڕیوەدەبات، کە بە یەکێک لە گەورەترین ڕووداوە ئەدەبییەکانی ساڵانەی کوردستان و تەنانەت ڕۆژهەڵاتی ناوەڕاست دادەنرێت. کەسانی ڕۆشنبیر لە سەرانسەری ڕۆژهەڵاتی ناوەڕاست و تەنانەت ئەورووپا بەشداریی تێدا دەکەن.
مێژوو
بنکەی ڕووناکبیریی گەلاوێژ لە ساڵی ١٩٩٦ لە شاری سلێمانی لە باشووری کوردستان دامەزراوە. هۆکاری ئەوەی کە ناوی بنکەکە گەلاوێژە ئەوەیە بە مەبەستی ڕێزگرتن و پێزانین لە ئیبراهیم ئەحمەد ڕۆشنبیری کورد بووە، چونکە ئەم نووسەرەی کورد گۆڤاری گەلاوێژی لە نێوان ساڵانی ١٩٣٩ تاکوو ١٩٤٩ لە شاری بەغداد چاپ و بڵاوکردووەتەوە. بنکەی ڕووناکبیریی گەلاوێژ ئامانجی بایەخدانەوە بە ئەدەب و کولتوور و ڕۆشنبیری لە کۆمەڵگای کوردستان ڕاگەیاندووە.
