پێ کوڵە

زانیاری دەربارەی پێ کوڵە

گیایەکی عەلەفی و خزندەیە و بۆ خۆی دەڕوێت، یەک ساڵەیە گەڵای نزیکە لە شێوەی گەڵا نۆک، میوەکەی سێ سوچە و دڕک و چقڵیی تیژی پێوەیە و بەرز نابێتەوە.

سوودەکانی پێ کوڵە

• میز هێنەرێکی بەهێزە و بۆ فڕێدانی بەردی گورچیلە و میزەڕۆ زۆر بەسوودە.
• نەخۆشی میزەڵدان و بەرد و ڕمڵ چارەسەر دەکات.
• جوڵەی ڕیخۆڵە زیاد دەکات و ئازار شکێنە.
• ڕەگ و گەڵا و بەرەکەی بۆ دەرمانە ئەگەر هەمووی بکوڵێت و ڕێژەی (٣)پەرداخی لێ بخورێتەوە بە چوارجار بۆ برینی سوزەنەک و میزەڕۆ چارەسەرە.
• وا باشە بۆ سوزەنەک بە ئاوی لیمۆی تازە و بە هێلکە بەیەکەوە بکوڵێت و بخورێت ئەگەر وشک کراوە و هاڕاو بێت(١٠)گرام لە گەڵا و ڕیشە و تۆو تێکەڵ بکرێت و دەم بکرێت.
• ئەگەر تەنها تۆوەکە بوو (٢٥)گرام دەم بکرێت و لەگەڵ زەیتی بادەمی شیرین بە ئەندازەی ئەو یان کەمێک زیاتر لە ڕۆژیکدا بە دوو جار یان سێ جار بخورێت ڕەنگی ڕوخسار دەکاتەوە و توانای سێکسی زیاد دەکات بۆ گەرم مەزاج.
• بۆ دانانی بەردی گورچیلە دەنکە گەنمەشامی و پێ کوڵە و توێکڵی وشککراوی کاڵەک هەریەکیان بە کێشی (٣٠)گرام دەمیان بکە و بەیەکەوە نیوەی بەیانی بە سکی بەتاڵ و نیوەی عەسر بخۆرەوە، ئەگەر سێ ڕۆژ بەردت دانەنا هەندێک دەرمانی تاڵ کە بۆ ئەو شتە باشە لەگەڵی بخورێت سێ ڕۆژی تر چارەسەرە.

سەرچاوەکان

1. بۆردی نوسەرانی ئینسکلۆپیدیای زانیاری
2. سروشت و تەندروستی / ئامادەکردن: صلاح عبداللە ابراهیم