ماهیر حەسەن

له‌لایه‌ن: - محەمەد ڕزگار محەمەد ڕزگار - به‌روار: 2021-08-13-16:12:00 - کۆدی بابەت: 6284
ماهیر حەسەن

ناوه‌ڕۆك

گەورەی کۆمیدیای کوردی

ماهیر حەسەن (بە عەرەبی: ماهر حسن، بە ئینگلیزی: Mahir Hassan)، لە ١٠ـی کانوونی دووەمی ١٩٦٥ لە شارۆچکەی عەربەت لە پارێزگاری سلێمانی لەدایکبووە، خوێندنی لە سلێمانی تەواوکردووە و لە پەیمانگای هونەرە جوانەکان لە ساڵی ١٩٨٥ بەشی شانۆی تەواوکردووە، هەر لە ساڵی ١٩٧٩ـەوە دەستی بە کاری هونەری کردووە و زیاتر لە ٢٠٠ بەرهەمی هەیە.

ساڵی ١٩٨٣ دەبێتە باشترین نواندنکار لە شانۆیی "قاتێک جلت وەرگرت".

یەکەمین بەرهەمی شانۆیی "چینی چاوی چەوساوەی کرێکاران بە دەستی ئاغا و دەرەبەگدا" بووە و بەناوبانگترین بەرهەمەکانیشی بریتین لە (یاخیبوونی ستار، هەمەڕەنگ، پەتریپۆت، ماڵەکەی مەعروف، بەخت ڕەش، گەردەلوول، فەنتەڵۆس، کەشکۆڵ).

کاری بەرهەمهێنانی بۆ ١٣ بەرهەمی شانۆیی کردووە و یەکێکە لە دامەزرێنەرانی تیپی هونەری ڕەنگاڵە، و لە ٥٠٠ بەرهەمی تەلەفزیۆنیدا دەرکەوتووە، خاوەنی ١٠ فیلمی سینەماییە و ساڵی ٢٠٢١ـیش لە فیلمی ٠٩ بەشداربووە.

زۆرینەی کات لەگەڵ هونەرمەند ئەحمەد جۆڵا دەردەکەوێت و پێکەوە دوانەیەکی هونەری کۆمیدییان دروستکردووە و گەورەترین دەرکەوتنیان دەگەڕێتەوە بۆ درامای ماڵەکەی مەعروف کە ماهیر حەسەن خۆی کاری نووسینی بۆ دراماکە کردووە.

دوور لە کۆمیدیا کەسێکی خەمخۆر و ژینگەپارێزە و لە زۆرینەی چالاکییە مرۆییەکاندا دەردەکەوێت.

ژیانی تایبەتی

ساڵی ١٩٨٨ هاوسەرگیری لەگەڵ خاتوو منیرە پێکهێناوە و خاوەنی ٢ کوڕ و ٢ کچە، خۆی دەڵێت ژیانی منداڵی زۆر سەخت بووە و ٣٠ کاری کردووە لە تەمەنێکی کەمدا، کە لە پۆستێکیدا بەمشێوەیە ڕیزیان دەکات:

1- پسکیت و بنێشت و جۆرەکانی شیرینی 
٢ -محەلەبی فرۆشتن 
٣ - ئەزبەرید فرۆشتن 
٤ - شەکلەمە فرۆشی 
٥ - پەشمەک فرۆشی
٦ - دەنکە ھەنار فرۆشتن
٧ - کالیارو ترۆزی فرۆشتن 
٨ - گووڵە بەڕۆژە فرۆشی 
٩ - شوتی فرۆشی 
١٠- لیمۆ فرۆشتن 
١١- مۆز فرۆشی 
١٢- یانسیب دانان 
١٣- بلیت فرۆشی 
١٤- ترشیات فرۆشتن 
١٥- جگەرە فرۆشتن 
١٦- توحفیات و فەرشی بچوکی ئێرانی 
١٧- حەماڵی 
١٨- شیش بەستن 
١٩- گەچکاری 
٢٠- بۆیاخچێتی دیوار 
٢١- شاگردی دیوار دانان 
٢٢- کارکردن لە سایلۆی سلێمانی لە ١٢ـی شەو بۆ ٨ـی بەیانی.
٢٣- کارکردن لە نانەواخانە لە دووی شەو بۆ بەیانی. 
٢٤- ئاسنگەری لە گەنجینەی قەدەم خێر 
٢٥- شاگرد چێشتخانە
٢٦- شاگرد بەرگدروو
٢٧- دەلاکی 
٢٨- مەسکەت و لەبزینە فرۆشی لە حەفتاکان. 
٢٩- کاری دامەزراندنی ئامێری سینەما لە ساڵی ١٩٨٠ و ١٩٨١. 
٣٠- کاری ھونەری لە پشتی شانۆ و پاککردنەوەی سەر شانۆ.


سەرچاوەکان



1861 بینین