ناگاساکی

ناساندن

ناگاساکی یان ناکازاکی (بە ئینگلیزی: Nagasaki، بە عەرەبی: ناغاساكي) پایتەخت و گەورەترین شاری پارێزگای ناگاساکییە لە دوورگەی کیوشو لە ژاپۆن. تاکە بەندەرێکە کە لە ماوەی سەدەی ١٦ تا نۆزدەهەمدا بۆ بازرگانی لەگەڵ پورتوگالییەکان و هۆڵەندییەکان بەکارهاتووە. بەشێک لە ناگازاکی شوێنی بنکەیەکی گەورەی هێزی دەریایی ئیمپراتۆری ژاپۆن بوو لە کاتی جەنگی یەکەمی چین و ژاپۆن و جەنگی ڕووسیا و ژاپۆن. لە نزیک کۆتایی جەنگی جیهانیی دووەم، بۆردومانە ئەتۆمییەکانی ئەمریکا بۆ سەر هێرۆشیما و ناگاساکی، ناگاساکی کردە دووەم و دوا شار لە جیهاندا کە تووشی هێرشی ئەتۆمی بێت.

جوگرافیا و کەشوهەوا

نیمچەدوورگەکانی ناگاساکی و نیشیسۆنۆگی لە سنووری شارەکەدا هەڵکەوتوون. شارەکە بە شارەکانی ئیساهایا و سایکای و شارۆچکەکانی تۆگیتسۆ و ناگایۆ لە ناوچەی نیشیسۆنۆگی دەورە دراوە. ناگاساکی لە سەرەوەی کەنداوێکی درێژدایە کە باشترین بەندەری سروشتی لە دوورگەی کیوشو پێکدەهێنێت. ناوچەی سەرەکی بازرگانی و نیشتەجێبوونی شارەکە لەسەر دەشتێکی بچووکە لە نزیک کۆتایی کەنداوەکە.

دوو ڕووبار کە بە بڕینێکی شاخاوی دابەشکراون و دوو دۆڵی سەرەکی پێکدەهێنن کە شارەکە تێیدا هەڵکەوتووە. ڕووبەری گشتیی شارەکە ٤٠٥,٨٦ کیلۆمەتری چوارگۆشەیە.

ناگاساکی کەشوهەوای ژێر گەرمی شێداری تایبەتی کیوشو و هۆنشۆی هەیە، کە بە زستانی سووک و هاوینی درێژ و گەرم و شێدار تایبەتمەندە. لەدوای کانازاوا و شیزوۆکا، پڕبارانترین شاری گەورەیە لە ژاپۆن.

دانیشتووان

دانیشتووانی شارەکە لە ساڵی ٢٠٢٢ گەیشتووەتە ٤٠٧,٠٠٠ کەس.

سەرچاوەکان

1. "AtomicBombMuseum.org – After the Bomb".
2. "今月のうごき（推計人口など最新の主要統計）"
3. "令和２年全国都道府県市区町村別面積調 - 長崎県"
4. Boxer, The Christian Century in Japan 1549–1650, p. 100–101
5. Diego Pacheco. "Xavier and Tanegashima." Monumenta Nipponica, Vol. 29, No. 4 (Winter, 1974), pp. 477–480
6. Hakim, Joy (January 5, 1995). A History of US: Book 9: War, Peace, and All that Jazz. New York City: Oxford University Press. ISBN 978-0195095142.
7. あすにかけ全国的に厳しい冷え込み続く