ناوه‌ڕۆك
ئاستی داهاتی نەتەوە و ڕادەی پەرەسەندنی پشت دەبەستێت بەم هۆكارانەی خوارەوە
بڕ و جۆری دەرامەتە ئابوورییەكان
بڕ و جۆری دەرامەتە ئابوورییەكان (سروشتی و مرۆیی) بە گرنگترین هۆكار دادەنرێـ لە دیاریكردنی ئاستی داهاتی نەتەوە و توانای پەرەسەندنی، چونكە ئەگەر لە وڵاتێكی دیاریكراودا زەوی كشتوكاڵی باش و ئاوی زۆر هەبێـت، ئەوە مانای ئەوەیە كە توانای پەرەپێدانی ئابووری لەو وڵاتە ئاسانتر دەبێت لە چاو دەوڵەتێك كە زەوییەكانی لەبار نەبێـت بۆ كشتوكاڵكردن.
شارەزایی هونەری
شارەزایی هەونەری و ڕادەی كەڵك وەرگرتن لە پێشكەوتنی تەكنەلۆژیا بووە بە دیارترین هۆكار لە دیاریكردنی داهاتنی نەتەوە و خێرا پەرەسەندنی، چونكە ئەو لێكۆڵینەوانەی لە دەوڵەتە پێشكەوتووەكاندا ئەنجام دراون ئەوەیان دووپات كردۆتەوە كە وەبەرهێنان لە سەرمایەی مرۆییدا هۆكارێكە بۆ زیادكردنی بەرهەمهێنان و پەرەپێدانی ئابووری.
هەر بۆیە نزمی ئاستی شارەزایی هونەریی لەو گرفتە سەرەكییانەیە كە ڕووبەڕووی دەوڵەتە دواكەوتووەكان دەبێتەوە لە كاتی هەوڵدانیان بۆ زیادكردنی بەرهەم و بەرهەمداریی و بەرزكردنەوەی ئاستی گوزەرانی گەلەكانیان.
سەقامگیری ڕامیاری
ئەزموونی زۆربەی دەوڵەتە تازە پێگەیشتووەكان ئەوەیان سەلماندووە كە سەقامگیر نەبوونی باری ڕامیاری یەكێكە لەو هۆكارە گرنگانە كە دەبێـتە كۆسپ لەبەردەم پەرەسەندنی ئابوورییان و بێ هێزی و لاوازی هاندەر بۆ وەبەرهێنان. بە تایبەتیش لە كەرتی تایبەتی كە دەبێتە هۆی دابەزینی ئاستی بەرهەمهێنان و گەشەكردنی ئابووری.
ڕامیاری ئابووری
میری لە ڕێگەی ڕامیارییە ئابوورییەكانی (دارایی – نەختینەیی – بازرگانی) ڕۆڵێكی گرنگ لە زیادكردنی داهاتی نەتەوەیی و هاندان و ئاڕاستەكردنی وەبەرهێنان بۆ كەرتە جیاوازەكانی ئابووری دەبینێت كە لەگەڵ هێنانەدی ئاواتەكانی كۆمەڵگە و خۆشگوزەرانییاندا بگونجێت.
ئاستی خستنەگەڕی بنەماكانی بەرهەمهێنان
بەرهەمی نەتەوەیی كۆمەڵگە ناگاتە ئەوپەڕی قەبارەی بەرهەمهێنانی خۆی، ئەگەر ئاستی خستنەگەڕی هۆیەكانی بەرهەمهێنان كەتر بێت، لە ئاستی خستنەگەڕی تەواوەتی خۆی، ئەمەش مانای بەفیڕۆدان و فەوتاندنی دەرامەتە ئابوورییە ڕەخساوەكانە، كە لە ئەنجامدا دەبێتە هۆی لەدەستدانی دەرفەتی پێشكەوتن و پەرەسەندنی ئابووری.
