وشەی پشکۆ - شێرکۆ بێکەس

وشەی پشکۆ - شێرکۆ بێکەس

له‌لایه‌ن: ئاڵەکۆک - به‌روار: 2021-10-26-22:46:00 - کۆدی بابەت: 6999
وشەی پشکۆ - شێرکۆ بێکەس

ناوه‌ڕۆك

وشەی پشکۆ

شاعیر: شێرکۆ بێکەس

بەرهەم: تریفەی هەڵبەست

شیعر: وشەی پشکۆ

لەباتی نێرگز چەپکە هەڵبەستی
سۆزی دەروونم ئەکەم بەدیاریی

بۆ ئەو کەسانەی کە خۆشەویستیی
گیانیان ئەبەخشن بەکوردەواریی

***

لەباتی ئاگر بەپشکۆی وشەی
زمانم، نەورۆز هەڵئەگیرسێنم

لەباتی درەخت ئەم شەوە ڕەشەی
ناکۆکیی کوردی تیا ئەسووتێنم. 

***

ئەو دڕک و چقڵەی ئەمساڵ چەقینە
پەڕەی گوڵاڵەی جەژنی نەورۆزم

ئەو فرمێسکانەی ئەمساڵ پەڕینە
چاوی هەزاران کوردی دڵسۆزم

***

ئەو هەنسکانەی لەقوڕگی شاخا
پەنگیان خواردەوە بوون بەهەڵمی خەم

ئەو ساوایانەی لەکۆشی داخا. 
مەمکی بێشێریان خرایە سەر دەم

***

گووناهیان ئەستۆی ئەوانە ئەگرێ
کە بوونە زستان بۆ نەورۆزەکەم

دەستێ فرمێسکی ئازارم ناسڕێ
سووربووبێ بەخوێن، خوێنی هۆزەکەم. 

***

بەڵام کام ناپاک توانی شاڵاوی، 
پڵنگی تۆڵەم ڕابوەستێنێ. 

یان کام ئەژدەهاک توانی گەرداوی
دەریای هەڵچوونم تیا بسرەوێنێ. 

***

تا لووتکەی سپی، ڕێچکەی قەترە خوێن. 
ڕژاوە بەڕێی دیاری خەباتا

بۆیە گوڵاڵەم لەوێدا ئەڕوێن
تا دیار بن لەناو باخی ئاواتا. 

***

ئاگری کەژی جەژنی شانازیی
بەفوارەی خوێنم خۆش بووە ئەمڕۆ

بۆیە ئاوازی بەستەی ئازادیی
بەهەزاران دڵ نۆش بووە ئەمڕۆ

***

چەکووشی مەڵاس لەدەستی زبرا
چیرۆکی هێزی ئەو برسیانەیە

لەش ئەتوێننەوە لەناو ئاگرا
«کاوە»م نموونەی ئەو داستانەیە. 

***

کاوەی سەردەستەی چەوساوەی مێژووم
ئەو بانگەی کە دای لەلووتکەی بەرزا

بۆ نەوەی کوردی ئەمڕۆ و داهاتووم
دەنگ ئەداتەوە لەگەڵ نەورۆزا. 

***

ڕەش و ڕووتی کورد ئارەقی ڕەنجیان
کردە سەر زەوی تینووی وڵاتم

ئەوسا دروێنەی سەختی تێکۆشان
بوو بەخەرمانی بەرهەمی مارتم

دیاریی نەورۆزی ١٩٦٧


سەرچاوەکان

10 بینین