ناوه‌ڕۆك
سەرەتا
ڕێبازی بکوژان ڕێنیسانس (بە عەرەبی: عقيدة القاتل عصر النهضة، بە ئینگلیزی: Assassin's creed renaissance) ڕۆمانێکی هونەری یان خەیاڵی و مێژووییە، گوزارشت دەکات لە چالاکییەکانی بکوژێک سەر بە ڕێبازی حەشاشییەکان لە وڵاتی ئیتاڵیا، بەتایبەت لە سەردەمی ڕۆشنگەری یاخود ڕێنیسانس.
ناسنامەی کتێبەکە
| ناو | Assassin's creed: renaissance |
| نووسەر | ئۆلیڤەر بۆودن |
| زمان | ئینگلیزی |
| ژانەر | ڕۆمانی هونەری، مێژوویی |
| دەزگای چاپ | Unisoft publications و Penguin publication |
ناوەڕۆکی کتێبەکە
دەستپێکی ڕۆمانەکە بەوە دەست پێدەکات کە دافیرێزی ئاودیتۆرێ کە کەسایەتییەکی ناوداری شاری فلۆرەنسیایە چاوەڕێی هاتنە دونیای منداڵەکەیەتی، کاتێک لە دایک دەبێت ناگری و سەرەتا وا هەست دەکرێت مردووە بەڵام کاتێک دافیرێزی کە دەکاتە باوکی کۆرپەلەکە منداڵەکەی لە ئامێز دەگرێت دەست بە جووڵە دەکات و دەست بە گریان دەکات، لەم ساتەدا باوکی ناوی دەنێت "ئێزیۆ".
ئێزیۆ کاتێک گەورە دەبێت پێچەوانەی باوکی و دوو براکەی کەسێکی لاسار و شەڕانی و لە هەمان کاتدا سوود لە کاتەکانی وەرناگرێت و خەریکی کاری پوچە. بە تایبەتی پەیوەندی دروست کردن لەگەڵ کچانی هاتەمەنی خۆی.
ئێزیۆ لە ڕووداوێکی نەخوازراودا باوکی بە تۆمەتی ئەوەی بکوژە و لە نەوەکانی حەشاشییەکانە لەگەڵ دووان لە کوڕەکانی دەستگیردەکرێت و لە شەقامی سیگنۆرا دەکوژرێن. ئێزیۆ هەر یەک لە ماریا ئاودیتۆرێی دایکی و کلاودیای خوشکی لەگەڵ خۆیدا دەباتە قەڵای "ماونت گۆریۆ" کە ماریۆی مامی سەرکردەی بوو. لێرەوە بۆی دەردەکەوێت کە لە خێزانی بکوژەکانە و دەبێت پارێزگاری بکات لە خێزانەکەی و ناو و ناوبانگیان بپارێزێت.
لایەنی هونەری یاخود خەیاڵی کتێبەکە
خودی ئێزیۆ و خێزانەکەی کەسانی خەیاڵین و وەرگیراون لە یاری Assassin´s creed 2، بەشێک لە کارەکتەرەکان و گتوگۆیەکانیش خەیاڵین و دوورن لە ڕاستی.
لایەنی مێژوویی کتێبەکە
شوێنی ڕووداوەکان سەردەمێکی ڕاستەقینەیە و ڕووداوەکانیش ڕاستەقینەن. بەشێکێ زۆر لە کارەکتەرەکانی ناو ڕۆمانەکە لە ژیانی ڕاستیدا بوونیان هەبووە، وەکو "لیۆناردۆ داڤێنچی، نیکۆلۆ ماکیاڤێلی، لۆرانزۆ دی مێدچی و پاپا ئەلیکساندەری شەشەم و چەندان کارەکتەری تر".
لایەنی جیاوازی ڕۆمانەکە
ڕۆمانەکە جیاواز لە هەر ڕۆمانێکی تری ئینگلیزی لە گفتوگۆیەکاندا هەندێک جار وشە و زاراوەی ئیتاڵی هاتوونە بەکارهێنان. جا ئەم وشانە لە کۆتایی کتێبەکەدا لە چەند پەڕەیەکدا واتاکانیان بە ئینگلیزی نووسراوە.
