ناوه‌ڕۆك
تێکڕای باران لە مانگەکانی ساڵدا
لە کوردستاندا، لە مانگی نۆڤەمبەرەوە باران دەبارێت، بەرە بەرەش لە مانگەکانی دواییدا، بارستاییەکەی زیاد دەکات هەتاکوو دەگاتە لوتکە لە مانگی دوازدە و و مانگی یەکدا، پاشان ئەم لوتکەی بارانە، وردە وردە لە مانگەکانی دواییدا نزم دەبێتەوە، هەتاکوو دەگاتە ئەو پەڕی نزمی لە مانگی حزەیراندا، بەڵام لە مانگەکانی حەوتەم و هەشتەمدا، بە دەگمەن نەبێ باران نابارێت، لە زۆربەی ناوچەکانیشدا بە تەواوی باران نابارێت.
وا دیارە پەیوەندییەکی توند، لە نێوان بارستایی باران و پلەی گەرمیدا هەیە، ئەم دیاردەیە لە مانگەکانی ساڵدا، زیاتر دەردەکەوێت، هەتا پلەی گەرما نزم دەبێتەوە، ئەوەندە باران زیاتر دەبارێت و بە پێچەوانەشەوە، ئەمەش زیاتر لەبەر ئەوەیە کە گەرما شێی هەوا دەکاتە هەڵم و ڕێگەی یەکگرتنی پێنادات.
جیاوازی بارستایی باران لە مانگێکدا، لە نێوان ئێستگەکانی باراندا، لە شوێنێکەوە بۆ شوێنێکی دیکە دەگۆڕێ. هەموو ئەو ئێستگانەی، کە کەوتوونەتە سەر ڕێگای تۆفانەکانی زەریای ناوەڕاست و خەزەر و ڕەش، ساڵان دوازدەی مانگ بارانی لێ دەبارێ، بۆ نموونە، دیاربەکر، گازی ئانتەب و کیلیس... هتد، بەڵام ئەو ناوچانەی لە ژێر کار تێکردنی ئەم تووفەدا نیین و دوورن، لە مانگەکانی پێنج و شەش و حەوت و هەشتدا، بە تەواوی وشکن، بۆ نموونەم مەخموور، شەنگار و چورتا... هتد.
