ناوه‌ڕۆك
ناساندن
میکائیل (بە ئینگلیزی: Michael، بە عەرەبی: ميكائيل) یەکێکە لە فریشتەکان، ناوی لە قورئان و فەرموودەکانی پێغەمبەر محەمەدەوە (ﷺ) هاتووە، ئەرکی باراندنی باران و سەوزکردنی ڕووەکەکانی لەسەر شانە و یەکێکە لە بەڕێزترین فریشتەکان لەلای خوای گەورە. باوەڕبوون بە میکائیل لەسەر هەموو موسوڵمانێک فەرزە و لە قورئانی پیرۆزدا باسی کراوە، هەروەک چۆن باوەڕبوون بە فریشتەکان لقێکە لە باوەڕبوون بە خوا و یەکێکە لە پایەکانی باوەڕ.
لە قورئاندا
لە قورئاندا لە سوورەتی البقرة لە ئایەتی ٩٨ ناوی هاتووە: مَنْ كَانَ عَدُوًّا لِلَّهِ وَمَلَائِكَتِهِ وَرُسُلِهِ وَجِبْرِيلَ وَمِيكَالَ فَإِنَّ اللَّهَ عَدُوٌّ لِلْكَافِرِينَ.
واتە: هه‌ر كه‌سێك دوژمنی خوای گه‌وره و فریشتەکانی و پێغه‌مبه‌رانی و جوبرەئیل و میکائیل بێت (به‌تایبه‌ت باسی كردوون له‌به‌ر ڕێزیان) ئه‌وه به دڵنیایی ئه‌و كه‌سانه بێباوەڕن و خوای گه‌وره‌ش دوژمنی بێباوەڕانە.
ئەم ئایەتە چەند لێکەوتەیەکی هەیە:
چیرۆکی یەکەم: ئەوەیە جوولەکەکان چەند پرسیارێکیان لە پێغەمبەر کرد، ئەویش بە وەڵامێکی ورد و گونجاو وەڵامی هەموویانی دایەوە، لە کۆتایی فەرموودەکەدا پرسیاریان لێکرد دەربارەی سروش، کە ئایا کێ دەینێرێتە خوارەوە بۆی، پێغەمبەر وەڵامی دایەوە کە جوبرەئیل -سڵاوی خوای لەسەر بێت- ئەو کەسەیە کە لەلایەن خواوە سپێردراوە بۆ ئەوەی سروش بنێرێتە خوارەوە، بۆیە جوولەکەکان وتیان کە دوژمنی ئەوانە، بە پێچەوانەی میکائیل کە دەڵێن دەیانپارێزێت.
چیرۆکی دووەم: کاتێک عومەری کوڕی خەتتاب ڕۆژێک چووە ناو پەرستگای جولەکەکانەوە، چەند پرسیارێکی لە بارەی جوبرەئیل و میکائیل کرد کە، ئەوانیش وەڵامیان دایەوە: جوبرەئیل لەلای ڕاستی و میکائیل لەلای چەپی خوان و دوژمنایەتی لە نێوانیاندا هەیە، ئەویش وەڵامی دانەوە و وتی: دوژمنایەتی لە نێوانیاندا نییە، بەڵام کوفر زاڵ بووە بەسەرتاندا.
تایبەتمەندییەکانی
- خوای گەورە لە ڕووناکی دروستی کردووە، پێغەمبەریش ئاماژەی بەو شتە کردووە کە دەفەرموێت: (فریشتەکان لە ڕووناکی دروستکراون).
- لە مرۆڤەکان گەورەتر و پانترە
- یەکێکە لە باشترین فریشتەکان؛ چونکە بەشداری شەڕی بەدری کردووە.
- هیچ ڕەگەزێکی نییە، نە نێرە نە مێیە.
- ناخوات و ناخواتەوە، بێزار نابێت و ماندوو نابێت.
- پەیوەندییەکی سەرەکی بە ژیانەوە هەیە، چونکە ڕاسپێردراوە بە باراندن.
