بزن له‌ گێتی زینده‌وه‌ردا

له‌لایه‌ن: عه‌لادین سه‌جادی - به‌روار: 2020-08-08-15:12:00 - کۆدی بابەت: 336
بزن له‌ گێتی زینده‌وه‌ردا

ناوه‌ڕۆك

ده‌رباره‌ی گێتی زینده‌وه‌ر

په‌رتووكی "گێتی زینده‌وه‌ر" یه‌كێكی دیكه‌ له‌ شاكار و نووسراوه‌كانی نووسه‌ر و زانای گه‌وره‌ی كورد (عه‌لادین سه‌جادی)یه‌ ، كتێبی گێتی زینده‌وه‌ر كتێبێكه‌ دنیایه‌كی سه‌ربه‌خۆی گرتووه‌ له‌ باره‌ی گیانله‌به‌ران ، دار و دره‌خت ، كه‌ڵك و نرخیانه‌وه‌ ، هۆش و بیریانه‌وه‌ ، چۆنیه‌تی ژینیانه‌وه‌ ، ئه‌و شتانه‌ تیایانا هه‌ن ، ئه‌و به‌رهه‌مانه‌ی كه‌ ئه‌یده‌ن ، ئه‌و كارانه كه‌ ئه‌یكه‌ن ، ئه‌و سروشتانه‌ كه‌ هه‌ر هه‌ن .


ناساندن

بزن حه‌یوانێكی چه‌توونی هارو هاجه‌ ، له‌گه‌ڵ ئه‌وه‌شا زۆر گه‌وجه‌ ، ته‌نانه‌ت باسی گه‌وجی یه‌كێ بكرێ ئه‌ڵێن حه‌چه‌یه‌ ، واته‌ ڕیشێكی زلی هه‌یه‌ و عه‌قڵێكی كه‌م! . بزن له‌مه‌ڕ شیری زۆرتره‌ ، پێستی له‌ پێستی ئه‌ستوورتره‌ ، پیوی له‌مه‌ڕ زۆرتره‌ وه‌كو ئه‌وه‌ وایه‌ كه‌ دوگی له‌ ناو زكیا بێ .تاقی كراوه‌ته‌وه‌ (كار) كه‌ به‌چكه‌ شێری پێ چاو بكه‌وێ ئه‌بورێته‌وه‌ ، كه‌ به‌چكه‌ شێره‌كه‌ له‌ به‌رچاویا نه‌ما ورده‌ ورده‌ هۆشی پیا دێته‌وه‌ و دێته‌وه‌ سه‌رخۆ . له‌ چه‌توونی بزن ئه‌وه‌یه‌ چ شوێنێك سه‌خته‌ ئه‌چێته‌ ئه‌وێ ، گه‌ڕه‌كانیشیان له‌ سه‌رچاوه‌ ئاو ئه‌خۆنه‌وه‌ .

 

به‌كارهێنانی بزن له‌ مێژووی كورد دا

  • خواردنی گۆشتی بزن خه‌فه‌ت و كه‌م فیكری و به‌ڵغه‌م زیاد ده‌كات.
  • كه‌سێ كه‌ زۆر دمه‌ڵ ده‌ركا خواردنی گۆشتی بزن بۆ ئه‌و باشه‌ .
  • شاخی بزنی سپی بكوترێ و بكرێته‌ ناو پارچه‌ په‌ڕۆیه‌كه‌وه‌ ، ئه‌مه‌ له‌ ژێر سه‌ری یه‌كێكی نووستودا دابنرێ خه‌به‌ری نابێته‌وه‌ مه‌گه‌ر له‌ ژێر سه‌ریا لایبه‌ن .
  • زراوی ته‌گه‌و زراوی گا تێكه‌ڵاو بكرێ ، یه‌كێ ئه‌گه‌ر گوێ گران بێ ئه‌و زراوانه‌ فتیله‌یه‌كیان پیا بێنێ و بیكاته‌ گوێچكه‌یه‌وه‌ گوێ گرانیه‌كه‌ی كه‌م ئه‌بێته‌وه‌ ، هه‌روه‌ها ئه‌مه‌ نایه‌ڵێ ئاویش بچێته‌ گوێچكه‌یه‌وه‌ .
  • ئه‌گه‌ر یه‌كێ برژانگی زیاده‌ له‌ چاوی ده‌ر ئه‌چوو ، بێنێ برژانگه‌كه‌ هه‌ڵبكێشێ پاشان زراوی ته‌گه‌ بهێنێ به‌ شوێنه‌كه‌یا ئیتر ده‌رناچێته‌وه‌ .
  • خواردنی مێشكی بزن ئه‌بێته‌ هۆی شت له‌بیرچوونه‌وه‌ و هه‌م و غه‌م .
  • ئه‌گه‌ر ئافره‌تێك خوێنی نه‌ ئه‌وه‌ستایه‌وه‌ ، پشقڵێكی بزن بپێچێنرێ له‌ تۆزێ خوریه‌وه‌ و هه‌ڵیبگرێ مه‌نعی خوێنه‌كه‌ی ئه‌كا .
  • زراوی بزن بسووتێنرێ و خۆڵه‌مێشه‌كه‌ی تێكه‌ڵاو بكرێ به‌ ڕۆنی زه‌یتوونه‌وه‌ ، ئه‌مه‌ بدرێ له‌ یرۆ هه‌م مووی زیاد ده‌كات هه‌م ڕه‌شی ده‌كا .
  • به‌ شیری بزن له‌سه‌ر كاغه‌ز ئه‌گه‌ر شتێك نووسرا خه‌ته‌كه‌ی دیارنه‌بێ ، كه‌ خرایه‌ ناو ئاو نوسینه‌كه‌ به‌ خه‌تێكی سپی ده‌رئه‌چێ و دیار ئه‌بێ .
  • ئه‌گه‌ر یه‌كێ موو له‌ شوێنێكی ئه‌هات و ئه‌یویست لێ نه‌یه‌ ، زراوی بزن بێنێ له‌گه‌ڵ نه‌وشادر وه‌یا له‌گه‌ڵ كه‌وه‌ردا تێكه‌ڵاوی بكا و مووه‌كه‌ له‌ شوێنه‌كه‌ هه‌ڵكێشێ و پاشان به‌و بیهه‌نوێ ئیتر مووی ده‌رناچێته‌وه‌ .
  • ئه‌گه‌ر یه‌كێ میزه‌ چورتكێ هه‌بوو ، ساقی بزن بێنێ پوخت بیشوا و ئه‌و ئاوه‌ بخواته‌وه‌ میزه‌چورتكه‌كه‌ی نامێنێ .
  • به‌شیری بزن له‌سه‌ر كاغه‌ز شتێ بنوسرێ ئه‌و نووسراوه‌ دیار نی یه‌ به‌ڵام كه‌ خۆڵه‌مێشی پیا بژه‌نرێ خه‌ته‌كه‌ ده‌رئه‌كه‌وێ .
  • ریشی ته‌گه‌ ببه‌سترێ به‌یه‌كێكه‌وه‌ كه‌ سێبه‌ڕۆی هه‌یه‌ له‌ كۆڵی ئه‌كه‌وێ. هه‌روه‌ها بۆ ژانه‌ سه‌ریش باشه‌ .
  • ئافره‌ت ئه‌گه‌ر تۆزێ له‌ جه‌رگی بزن هه‌ڵبگرێ وه‌كو شاف ماوه‌یه‌كی زۆر شه‌هوه‌تی كه‌م ئه‌بێته‌وه‌ .
  • ئه‌و كه‌سه‌ی كه‌ سپڵی هه‌یه‌ به‌ ده‌ستی خۆی هه‌ندێ له‌ سپڵی بزن ببڕێ و له‌و ژووره‌دا كه‌ خۆی تیا ئه‌نوێ هه‌ڵیواسێ ، كه‌ وشك بووه‌وه‌ ئه‌میش ژانی سپڵه‌كه‌ی له‌كۆڵ ئه‌كه‌وێ .
  • ئه‌گه‌ر یه‌كێك سپڵی هه‌بوو بزنێك بێنێ چل ڕۆژ له‌ ناو كوتكه‌یه‌كی داردا ئاوی بدا ، پاشان سه‌ری ببڕێ و سپڵه‌كه‌ی بخوا ، خۆی سپڵه‌كه‌ی له‌ كۆڵ ئه‌كه‌وێ .
  • ده‌رزی بكرێ به‌ خوێنی بزندا و گوێچكه‌ یا شوێنێكی تری پێ كون بكرێ ، ئه‌و شوێنه‌ ئاخری هه‌ر دێته‌وه‌ یه‌ك .
  • یه‌كێ مار پێوه‌ی بدا ، پێستی بزن كه‌ سه‌ر ئه‌بڕێ هه‌روا به‌و گه‌رمییه‌ بخرێته‌ سه‌ر شوێنه‌كه‌ بۆی چاكه‌ .
  • خواردنی شیری بزن له‌گه‌ڵ شه‌كردا پێست جوان ئه‌كا ، هه‌روه‌ها شیری بزن خواردن بۆ نه‌هێشتنی كه‌م فیكری و خه‌موخه‌فه‌ت و وه‌سوه‌سه‌ باشه‌ . وه‌كوو ئه‌مه‌ی هه‌یه‌ پووكیش بێ هێز ئه‌كاو تاریكایی له‌ چاودا په‌یدا ئه‌كا .
  • میزی بزن بكوڵێنرێ هه‌تا به‌ ته‌واوی خه‌ست ئه‌بێته‌وه‌ ، ئه‌م به‌ ئه‌ندازه‌ی خۆی شه‌كری تێكه‌ڵاو كرێ . ئه‌و كه‌سه‌ی گه‌ڕی هه‌یه‌ سێ جار له‌ حه‌مام بیدا له‌ له‌شی گه‌ڕیه‌كه‌ی چاك ئه‌بێته‌وه‌ .
  • شوێنێك له‌ له‌شا كه‌ سووتا پشقڵی ووشكی بزنی لێ بدرێ بۆی باشه‌ و چاكی ئه‌كاته‌وه‌ .
  • ئه‌ڵێین شاخی بزن سێ جار ئه‌م ئایه‌ته‌ی به‌سه‌را بخوێنرێ :((یوم تجد كل نفس ما عملت من خیر محضرا وما عملت من سوء تود لو ان بینها و بینه‌ امل بعید)). پاشان بخرێته‌ ژوور سه‌ری ژنێكی نووستوه‌وه‌ به‌بێ ئه‌وه‌ی خۆی پێ بزانێ ، پرسیاری هه‌ر شتێكی لێ بكرێ كه‌ بیزانێ جواب ئه‌داته‌وه‌


سەرچاوەکان

264 بینین