تەنیایی - شێرکۆ بێکەس

له‌لایه‌ن: - ئاڵەکۆک - به‌روار: 2021-10-15-04:13:00 - کۆدی بابەت: 6887
تەنیایی - شێرکۆ بێکەس

ناوه‌ڕۆك

تەنیایی

شاعیر: شێرکۆ بێکەس

بەرهەم: تریفەی هەڵبەست

شیعر: تەنیایی

شیرینەکەم! ژووری تەنیام
ئەمشەو بۆ غەریبیم ئەگری

چرپای خەم لێنیشتوی جێگام
خامۆشیی وا لەچوار دەوری. 

***

چاوەڕوانیی کورسی چۆڵم
تۆوی بێزاری ئەچێنێ

گڵۆپی کزی ناو هۆڵم
فرمێسک بەبێدەنگ ئەڕژێنێ! 

***

پەنجەرەکان، خۆڵی ڕۆژان: 
لەسەر شووشەی چاویان بارە

شیرینەکەم ئەمشەو ژیان
وەک ماڵەکەم چۆڵ و تارە. 

***

وێنەی پارم لێوی گاڵتە: 
لەئێستام هەڵئەقورتێنێ

گڕی خەیاڵ بۆ ئەو کاتە
جەرگی ئەمشەو ئەسووتێنێ. 

***

شیرینەکەم.. ژووری تەنیام
ئەمشەو بۆ غەریبیم ئەگری

چرپای خەم لێنیشتوی جێگام
تەنیایی وا لەچوار دەوری.


سەرچاوەکان



621 بینین