ناوه‌ڕۆك
سەرەتا
ئایا لە بڕیارە ڕاستەکان پەشیمان دەبینەوە (بە عەرەبی: هل نندم علی قراراتنا الصحيحة، بە ئینگلیزی: Do we regret about our right decisions) بڕیاردان بریتییە لە کردار و پرۆسەی هەڵبژاردنێکی سەرکەوتوو لە نێوان دوو بابەت یان چەند بابەتێک، یاخود بریتییە لە توانای هەڵبژاردنێکی سەرکەوتوو لەنێوان چەند هەڵبژاردەیەک. بڕیاردانی دروست و ڕاست بەند و پەیوەستە بە دوو هۆکاری سەرەکی کە بریتین لە:
- هەستەکانمان: واتا بۆ بڕیاردانێک لە ژیاندا، گەڕانەوە بۆ هەست و سۆزەکانمان بکەین بە بنەما و پشتی پێ ببەستین.
- عەقڵ و بیر و هۆش: واتا بۆ بڕیارەکانمان بە پشتبەستن بە داتا و چەمکە واقیعییەکان، گەڕانەوە بۆ ژیری و عەقڵ و لۆجیک بکەین بە بنەما و پشتی پێ ببەستین.
بۆیە هەر بڕیارێک ئەگەر بە دروستی بدرێت و باڵانسێک لەنێوان هەست و سۆزەکان لەگەڵ لۆجیک و عەقڵ دروست بکرێت، هاوکات دەرئەنجامی باشی هەبێت و لەگەڵ بنەما و پڕەنسیپەکانی ژیانت گونجاو بێت هیچ کات لێی پەشیمان نابیتەوە و بە پێچەوانەوە هەستی خۆشبەختی و ئارامی و متمانەبەخۆبوونت پێ دەبەخشێت.
گرنگی بڕیاردانی ڕاست لە ژیاندا چییە؟
- بڕیاردانی ڕاست هاوکارە لە چارەسەکردنی کێشەکان.
- دەرەنجامی بڕیاری ڕاست دەرفەت و هەلی زیاتر بە کەسەکە دەڕەخسێنێت.
- ئەگەر بڕیارەکانت ڕاست و تەواو بێت ئەوە هەستی ئارامی و خۆشبەخەتیت دەبێت و پەشیمان نابیت لە بڕیارەکانت.
- بڕیاری ڕاست متمانەبەخۆبوون و کەسایەتی بەهێز دەکات.
هەنگاوەکانی بڕیاردان بە شێوەیەکی دروست
- دیاریکردنی کێشە یان ئەو دەرفەتانەی کە بەردەستن.
- دانان و خستنەڕووی چارەسەری کێشە و هەڵبژاردەکان بە چەند شێوەیەک.
- دیاریکردنی لایەنی نەرێنی و ئەرێنی ئەو هەڵبژاردانەی کە داتناوە.
- لەکۆی کۆمەڵێک چارەسەر هەڵبژاردنی یەک وەڵام یان یەک چارەسەر.
- هەڵسەنگاندنی بۆچوون و هەڵبژاردنی کۆتایی و ئەنجامدانی گۆڕانکاری لە کاتی پێویست.
چەند ئامۆژگارییەک بۆ ئەوەی بە دروستی بڕیارەکانت بدەیت
- زانیاری تەواو لەسەر ئەو بابەتە کۆبکەرەوە کە دەتەوێت بڕیاری لەسەر بدەیت.
- دووربکەوە لە بڕیاردان لەو کاتانەی کە زۆر هەستیاریت واتا لە کاتی تووڕەبوون یان دڵخۆشییەکی زۆر بڕیار مەدە.
- کاتی پێویست وەرگرە بۆ بڕیاردان و خێرا مەبە لە بڕیارەکانت.
- بیر لە بارودۆخ و کاریگەری درێژخایەن و کورتخایەن و داهاتووی ئەو بابەتە لەسەر ژیانت بکەرەوە کە بڕیاری لەسەر دەدەیت.
- بەراوردی لایەنی ئەرێنی و نەرێنی بڕیارەکەت بکە.
- لەو بڕیارەی کە هەستەکەیت پێویستت بە یارمەتییە داوای هاوکاری لە کەسی ئەزمووندار بکە.
- لەکاتی بڕیاردان سوود لە هەڵەکانی ڕابردووت وەرگرە و لە بڕیار و ئەزموونێکی نوێدا هەڵەکانی ڕابردوو دووبارەیان مەکەرەوە.
- دووربکەوە لە چاولێکەری و لاساییکردنەوەی بڕیار و هەڵبژاردەی کەسانی تر، چونکە بارودۆخ و ژینگە و کەسایەتی تۆ لە بارودۆخ و کەسایەتی و ژینگەی کەسانی تر جیاوازە و هاوشێوە نییە.
- فشار یان زۆرلێکردن له بڕیارەکانت یان بڕیاردان لەژێر فشاری دەوروبەر و کەسی تر دەرئەنجامی باشی نابێت و هەستی پەشیمانیت بۆ دروست دەکات.
سەرچاوەکان
1421 بینین
