ناوه‌ڕۆك
ناساندن
باشترین دیاری بۆ هاوڕێ (بە ئینگلیزی: The Best Gift For A Friend، بە عەرەبی: أفضل هدية لصديقك) هەڵبژاردنی باشترین دیاری بۆ هاوڕێیەک لەسەر بنەمای بیرکردنەوەیە لە ئامانجی ئەم دیارییە، هەروەها سەبارەت بەو پەیامە ڕاستەقینەیەی کە کەسەکە دەیەوێت لە ڕێگەیەوە بیگەیەنێتە هاوڕێکەی، مەرج نییە ئەو دیارییەی کە هەڵیدەبژێریت نرخێکی زۆری هەبێت، ڕەنگە هەندێک دیاری بەخۆڕایی بێت، بەڵام لەناو خۆیاندا پەیامێک هەڵدەگرن کە مانای زۆر زیاتری هەیە بۆ هەرکەسێک کە وەریبگرێت، بۆیە ئەو بنەمایەی کە تاک دەبێت لەکاتی هەڵبژاردنی دیاری پەیڕەوی لێبکات، ئەو ناوەڕۆکەیە کە لە دیارییەکەدا هەیە.
جۆرەکانی دیاری
هەڵبژاردنی دیاری پەیوەستە بە زانینی جۆرەکانی ئەو دیاریانەی کە دەتوانرێت بدرێت بە هاوڕێیەک، لەوانە:
هەندێک دیاری گوزارشت لە شوێن یان شێوازی ناسینی ئەم هاوڕێیە دەکەن، یاخود پەیوەندی بە یادەوەرییەکی تایبەتی نێوانییانەوە هەیە و ئەم جۆرە دیارییە کاریگەرییەکی جوان لەسەر هاوڕێکە بەجێدەهێڵێت و ئەمەش هاوڕێیەتییەکە بەهێزتر دەکات. هەندێک دیاری پەیوەندی بە حەز و ئارەزووەکانی کەسەکەوە هەیە و ئەمەش واتای ئەوەیە کە تۆ هاوڕێکەت دەناسیت و دەزانیت ئارەزووەکانی چین و گرنگی بە وردەکارییەکانی ژیانی دەدەیت. بۆ نموونە، بۆ هاوڕێییەک کە ئارەزووی خوێندنەوە بێت کتێب یەکێکە لە باشترین هەڵبژاردنەکان. هەروەها دیاری دەکرێت ئەزموونێک بێت لەجیاتی شتێک، بۆ ئەمەش دەبێت بزایت هاوڕێکەت حەز بە چی جۆرە چالاکییەک دەکات، دەتوانن سەیری فیلمێک بکەن پێکەوە یان نانخواردن بێت لە ڕێستۆرانتە دڵخوازەکەی یان کۆرسی خوولیایەک بێت کە دەیەوێت فێری ببێت.
دەکرێت دیاری شتێکی تایبەت بێت بۆ نموونە ملوانکەی هاوڕێییەتی، جل یاخوود هەرشتێکی دیکەی لێکچوو کە بتووانن هەردووکتان هەتانبێت. یەکێکی تر لە جۆرەکانی دیاری هەرشتێکە کە خۆت دروستت کردبێت، ئەوە لەوانەیە خواردنێک یان شیرینییەک بێت، تابلۆییەک یان بازنێک بێت یان هەر کارێکی دیکەی دەستی بێت، کە ئەمە مانای ئەوە دەگەیەنێت کە توانیوتە کات تەرخان بکەیت بۆ هاوڕێکەت و ئەوت لا گرنگە.
بیرۆکەی جیاواز بۆ دیاری
کوپ کە دەتوانی تایبەتتری بکەیت بەوەی کە وێنەی لەسەر بێت یان ناوی هاوڕێکەت یان هەرشتێکی تری مانابەخشی لەسەر بنووسی. مۆم کە زۆر شێوازی هەیە و دەتوانی بە شێوە و بۆنی دڵخوازی هاوڕێکەت هەڵیبژێریت. سێتی پێنووس و فڵچە و کانڤاسی وێنەکێشان، بەتایبەتی ئەگەر هاوڕێکەت حەزی بە وێنەکێشانە. ئەلبوومێکی وێنەی تایبەت بە خۆت و هاوڕێکەت لەو کاتانەی بەیەکەوە بەسەرتان بردووە. ڕووەکی ناوماڵ یاخوود ئینجانەی گووڵ. نامەی دەستنووس.
