ناوهڕۆك
ناساندن
سان خوسێ (بە ئینگلیزی: San José، بە عەرەبی: سان خوسيه، بە ئیسپانی: saŋ xoˈse؛ بە واتای "سەینت یوسف")، پایتەخت و گەورەترین شاری کۆستاریکا و پایتەختی پارێزگای سان خوسێیە. ئەم شارە دەکەوێتە ناوەندی وڵات، لە ناوەڕاستی ڕۆژئاوای سێنتڕاڵ ڤالی لەناو سان خوسێ کانتۆن. سان خوسێ ناوەندی کارگێڕی حکوومەتی نیشتیمانی کۆستاریکا، ناوەندی چالاکیی سیاسی و ئابووریی، و ناوەندێکی گواستنەوەی سەرەکییە. ژمارەی دانیشتووانی سان خوسێ کانتۆن لە ساڵی 2011ـدا 288,054 کەس بوو، هەروەها ڕووبەری سان خوسێ 44.2 کیلۆمەتر چوارگۆشەیە و ژمارەی دانیشتووانەکەی لە ساڵی 2015ـدا 333,980 دانیشتوو بوو. ئەم کانتۆنە لەگەڵ چەند کانتۆنێکی دیکەی سێنتڕاڵ ڤالیدا، گەورە ناوچەیەکی گەورەتری وڵاتەکە پێک دەهێنێت، کە ژمارەی دانیشتووانەکەی لە ساڵی 2017ـدا زیاتر لە دوو ملیۆن کەس بوو. سان خوسێ بۆ ڕێزلێنان لە یوسفی شاری ناسرە ئەو ناوەی لێ نراوە.
مێژوو و گرنگی شارەکە
سان خوسێ لە ساڵی 1736 دامەزرا و ژمارەی دانیشتووانی شارەکه بەدرێژایی سەدەی هەژدە بەهۆی بەکارهێنانی بەرنامەڕێژی کۆلۆنییەوە بەرزبوویەوە. هەروەها لەڕووی مێژووییەوە شارێکی گرنگی ستراتیجی بووە و سێ جار وەک پایتەختی کۆستاریکا خزمەتی کردووە. سان خوسێ بەهۆی بەرزی کوالێتی ژیان و ئاسایشییەکەیەوە لەنێو شارەکانی ئەمریکای لاتیندا ناسراوە. بەپێی ئەو توێژینانەوەی کە لەسەر ئەمریکای لاتین کراون، سان خوسێ یەکێکە لە سەلامەتترین شارەکانی ناوچەکە و کەمترین توندوتیژی تێدا ئەنجام دەدرێت. لە ساڵی 2006ـدا شارەکە وەک پایتەختی ڕۆشنبیری ئیبێرۆ-ئەمریکی دەستنیشانکرا. جگە لەوانەش، شارەکە 15ـەیەم خێرا گەشەسەندوترین شاری جیهانە و لەلایەن جیهانگەری و تۆڕی توێژینەوەی شارەکانی جیهان (GaWC)ـەوه بە شارێکی جیهانی بێتا پۆلێنکراوە.
کەشوهەوا
بەپێی سیستەمی پۆلێنکردنی کەشوهەوای کوپن، شاری سان خوسێ کەشوهەوایەکی ساڤانایی خولگەیی هەیە. ڕێژەی دابارین لە نێوان وشکترین مانگ و باراناویترین مانگدا لە نێوان 6.3 بۆ 355.1 مللیمەتردا دەگۆڕێت، لە کاتێکدا تێکڕای پلەی گەرمی لە شارەکەدا گۆڕانکارییەکی کەمی بەسەردا دێت. گەرمترین مانگی ساڵ مانگی نیسانە و تێکڕای پلەی گەرمی 23.7 پلەی سەدیە، لە کاتێکدا ساردترین مانگ مانگی تشرینی یەکەمە و تێکڕای پلەی گەرمی 21.8 پلەی سەدیە.
