ناوه‌ڕۆك
ناساندن
سیفەتەکانی کەسایەتی گۆشەگیر (دەروونگەرا) (بە ئینگلیزی: Character traits of introverted personality، بە عەرەبی: صفات الشخصية الانطوائية).
سیفەتەکانی کەسایەتی گۆشەگیر
پێی باشترە کات بە تەنیا بەسەر بەرێت
کەسێکی گۆشەگیر پێی باشترە کاتەکانی تایبەتی خۆی لە دەرەوەی کار و بۆنە کۆمەڵایەتییەکان بە تەنیا بەسەر ببات نەک پەیوەندی لەگەڵ کەسانی دیکەدا بکات، ئەم کاتەش بە گرنگ دادەنرێت بۆ بەختەوەری تەندروستی و دەروونی خۆی، هەروەها هیچ کێشەیەکی نییە لە گەڕان بەدوای چالاکییە تاکەکەسییە سەرگەرمکەر و چێژبەخشەکاندا بۆ پڕکردنەوەی کاتەکانی وەک: خوێندنەوە، کاری دەستی، نووسین، و یارییە ئەلیکترۆنییەکان, سەیرکردنی فیلم و هتد، یان لەوانەیە لە ماڵەوە پشوو بدات و ئارام بێت بەبێ ئەوەی سەرقاڵی هیچ کارێک بێت.
پێویستی گۆشەگیری دوای تێکەڵ بوون لەگەڵ کەسانی تر
پێویستی مرۆڤ بۆ گۆشەگیری یان بەسەربردنی ماوەیەک بەتەنها دوای ئەوەی ناچار دەبێت تێکەڵاوی خەڵکی بکات، یەکێکە لە تایبەتمەندییە سەرەکییەکانی کەسایەتی گۆشەگیر، بەو پێیەی ئەوانەی ئەم کەسایەتیەیان هەیە هەست بە ماندووبوون و شەکەتی دەکەن کاتێک ناچار دەبن بۆ ماوەیەکی زۆر بەشداری بۆنە کۆمەڵایەتییەکان بکەن لە ئامادەبوونی زۆر کەسدا، و دوای ئەوە پێویستیان بە کاتێکی پشوودان و گۆشەگیری هەیە بۆ ئەوەی بیربکەنەوە و پێداچوونەوە بە خۆیان بکەن و هاوسەنگی ناوخۆیی بەدەستبهێننەوە، دەتوانرێت ئەمە بەو مانایە لێکبدرێتەوە کە کەسێکی دەروونگەرا وزەی خۆی لە دۆخە کۆمەڵایەتییەکاندا بەسەر دەبات. بە پێچەوانەی ئەو کەسانەی کە کەسایەتییەکی کراوەیان هەیە وزە و زیندوویی بەدەست دەهێنن لەکاتی کارلێککردن لەگەڵ کەسانی تردا، بەڵام ئەمە بەو مانایە نییە کە هەموو ئەو کەسانەی کەسایەتییەکی گۆشەگیریان هەیە لە ڕووی کۆمەڵایەتییەوە لاوازن، چونکە زۆرێکیان چێژ لە بەسەربردنی کاتێکی خۆش لەگەڵ کەسانی دیکە وەردەگرن بۆ پەیوەندیکردن لەگەڵیان و دڵنیا بوونەوە لێیان، لە هەمان کاتدا بازنەیەکی بچووک و داخراوی هاوڕێیان هەیە.
پێ باشترە بە تەنیا کار بکات
کەسێکی گۆشەگیر پێی باشە زۆربەی کاتەکان بە تایبەتی ئەرکی جۆراوجۆر ئەنجام بدات، جا لە شوێنی کار بێت یان لە دەوروبەری ماڵەوە و ئەمەش لە دەستکەوت و بەرهەمهێنانیدا دەردەکەوێت، چونکە بەرهەمەکەی باشترینە کاتێک بە تەنیا کار دەکات. ئەمەش لەبەر ئەوەیە کە کارکردن بەم شێوەیە ڕێگەی پێدەدات سەرنجی لەسەر تەواوکردنی کارەکان بێت بە کوالیتی بەرز ئەمەش بەو مانایە نییە کە مرۆڤە دەروونگەراکان ناتوانن لەگەڵ کەسانی دیکە کاربکەن، بەڵکو پێیان باشە پێش ئەنجامدانی ئەرکەکان وریابن و و کاتێک بۆ بیرکردنەوەیەکی ورد تەرخان بکەن و ئەمەش لەوانەیە هەندێک کێشەیان بۆ دروست بکات لەکاتی یارمەتیدانی کەسانی تر، یان کارکردن لە گروپێکدا.
توانای بیرکردنەوەی داهێنەرانە
کەسێکی دەروونگەرا بە بیرکردنەوەی داهێنەرانە دەناسرێتەوە، بەتایبەتی کاتێک بەتەنهایە، لەوانەیە ئەو پێی باش نەبێت بەشداری بکات لە دۆزینەوەی چارەسەر بۆ کێشە و تەحەددیاتەکان کاتێک لە ژیانی کار یان ژیانی کەسیدا ڕوودەدەن، کاتەکانی بۆ بیرکردنەوە بە هێمنی تەرخان دەکات، خاوەنی ئەم کەسایەتییە مەیلی هەیە زۆرترین توانا و ئەزموونەکانی بەکاربهێنێت کاتێک بیر لە چارەسەرکردنی کێشەکان دەکاتەوە، و لەوانەیە بیرۆکەی داهێنەرانە و بوێرانەی بۆ بێتە پێشەوە لە ئەنجامی شێوازی بیرکردنەوەی ناوازەی خۆی، تەنانەت وردەکارییە بچووکەکانیش گرنگی و ڕەچاوکردنی پێدەدەن و ئەنجام و چارەسەری نایاب بەدەستبهێنن.
خۆئاگاداری بەرز
مرۆڤی گۆشەگیر بە باش ناسینی خۆی جیادەکرێتەوە؛ ئەمەش لەبەرئەوەیە کە سەرنجی لەسەر بیرکردنەوە و هەستەکانی دەبێت و کاتێکی زۆر بەسەر دەبات بۆ چاودێریکردنیان و شیکردنەوەی کاردانەوە و پاڵنەرەکانی. هەروەها پێداچوونەوە بە خۆی دەکات و ئەزموونەکانی هەڵدەسەنگێنێت بۆ ئەوەی لێیان فێربێت. شایانی باسە کە ئەنجامدانی ئەو کارە بۆ هەستکردن بە چێژ و هەستکردن بە ناسینی خۆی پێویست و گرنگە ئەم هۆشیاری و گەڕانەش بریتییە لە زانینی ئەو خولیایانەی کە چێژیان لێ وەردەگرێت، ئەو لێهاتووییانەی کە دەتوانێت شارەزا بێت، و لێکۆڵینەوە لەسەر ئەو بابەتانەی کە سەرنجی ڕادەکێشن و ورووژێنن.
گوێگرتنێکی باش
زۆربەی کەسانی دەروونگەرا مەیلیان هەیە گوێگرێکی باش بن، بەو پێیەی ئەمە یارمەتیان دەدات زیاتر کەسانی دەوروبەریان بناسن و لێیان تێبگەن بۆ ئەوەی بڕیار لەسەر باشترین ڕێگە بدەن بۆ مامەڵەکردن لەگەڵیان، هەروەها گوێگرتن یارمەتیان دەدات چونکە وردن لە ڕێکخستنی بیرکردنەوەکانیان و خۆیان بۆ قسەکردن بە متمانەوە ئامادە دەکەن.
سادەیی
گۆشەگیرەکان بە ئاسانی هەستکردنیان بە ڕازیبوون دەناسرێنەوە، ئەمەش ڕەنگە بۆ ئەوە بێت کە زۆر شت هەیە کە لە چاویاندا سادە یان ئاسایین، بەڵام دڵخۆشییان بۆ دەهێنن، بەو پێیەی وردەکارییە بچووکەکان بەرز دەنرخێنن و گرنگی پێدەدەن ئەوان پێچەوانەی زۆر کەسایەتی دیکەن کە دڵخۆشکردنیان قورسە بەبێ ئەوەی هەمیشە دیاری و سوپرایزی گەورەیان پێشکەش بکەی، لەوانەیە کەسێکی گۆشەگیر بەختەوەری لە مانەوە لە ماڵەوە، چێژوەرگرتن لە کتێبێکی باش، گوێگرتن لە کەسێک کە خۆشی دەوێت، یان ئەنجامدانی هەندێک چالاکیی بێدەنگی دیکە بدۆزێتەوە.
دوور کەوتنەوە لە قەرەباڵغی
ئەو کەسانەی کە کەسایەتییەکی گۆشەگیریان هەیە هەوڵدەدەن تا دەتوانن خۆیان لە قەرەباڵغی و ئەو شوێنانە بەدوور بگرن کە ژمارەیەکی زۆر کەسی تێدایە ئەمەش ڕەنگە بەهۆی هەستکردن بە ناڕەحەتییانەوە بێت لە گفتوگۆکردن لەگەڵ کەسانی نامۆ یان سەرنج یان دیدگا لە کەسانی دیکە وەردەگرن. کاتێک ناچار دەبن بچنە شوێنە گشتیەکان، لەوانەیە هەوڵبدەن خۆیان سەرقاڵ بکەن بە خوێندنەوەی کتێبێک، یان دانانی هێدفۆن یان یاریکردن بە تەلەفۆن و هتد.
نووسینیان پێ باشترە لە قسەکردن
ئەو کەسانەی کە کەسایەتییەکی گۆشەگیریان هەیە، پێیان باشە لە ڕێگەی نووسینەوە باشتر خۆیان دەرببڕن، نەک ڕاستەوخۆ لەگەڵ کەسانی دیکە قسە بکەن، بەو پێیەی پێیان باشە بۆچوونەکانیان لەسەر کاغەز بنووسن، لە کاتی کارکردن یان لە کاتی بڕیاردان لە ڕێگەی نامە یان ئیمەیڵەوە بۆیان بنێرن. چونکە ئەمە دەرفەتیان پێدەدات کە کاتێک بۆ بیرکردنەوەیەکی قووڵ تەرخان بکەن و بارودۆخی دەوروبەریان لەبەرچاو بگرن و بە ژیرانە و متمانە بەخۆبوون هەڵیبژێرن و ئەمەش دەتوانێت بە ڕوونی لە ژینگەی کارکردنیاندا دەربکەوێت کاتێک کەسێکی دەروونگەرا پێ باشترە بۆچوونی خۆی لە ئیمەیڵێکدا بنووسێت نەک بیڵێت لەبەردەم کەسانی دیکەدا لە کۆبوونەوەکاندا.
سەربەخۆیی
گۆشەگیرەکان هەوڵدەدەن توانای پشت بەستن بەخۆیان باشتر بکەن بەبێ ئەوەی پێویستیان بە کەسانی تر بێت، چونکە ئەمە بە تەحەددایەک دەزانن بۆ پەرەپێدانی تواناکانیان، هەروەها هەستی سەربەخۆیی و توانای بەڕێوەبردنی ژیان و زاڵبوون بەسەر ئاستەنگەکانیدا بەرز دەکاتەوە مەیلیان هەیە بە تەنیا بەدوای چارەسەری کێشەکانیاندا بگەڕێن بەبێ ئەوەی داوای یارمەتی لە کەس بکەن و ئەمەش ئەزمونی ژیانیان و توانای پلاندانان بۆ تەواوکردنی کارەکانیان زیاد دەکات، و بە شێوەیەکی دروست بیربکەنەوە بۆ بڕیاردان.
چارەسەری کەسایەتی گۆشەگیر
کەسێکی گۆشەگیر دەتوانێت لەم کەسایەتییە ڕزگاری بێت بەم کارانەی خوارەوە:
مەشقکردنی بیرکردنەوە: بیرکردنەوە دەبێتە هۆی هەستکردن بە ئیسراحەت لەکاتێکی کورتخایەندا، هەروەها یارمەتیدەرە بۆ ڕزگاربوون لە وزەی نەرێنی بەرامبەر بە کەسانی تر و نەرێنی و فشار.
نووسینی بیرەوەری: مرۆڤ دەتوانێت خۆی لە گۆشەگیری ڕزگار بکات و خۆی ڕابهێنێت بۆ ئەوەی هەست بە ئەرێنی بکات بە نووسینی یاداشتنامەکانی ڕۆژانە، بەو پێیەی یاداشتنامەی نووسین یارمەتیدەرە بۆ نەهێشتنی فشاری دەروونی، هەروەها زۆر گونجاوە بۆ کەسێکی گۆشەگیر، بەو پێیەی حەزی لە قسەکردن نییە لەگەڵ ئەوانی تردا، نووسین بە گونجاوترین ڕێگە بۆ دەربڕینی هەستەکانی دەزانێت.
تەرکیز لەسەر بیرکردنەوە ئەرێنییەکان بکات: پێویستە کەسەکە ڕێگری لە بیرکردنەوەی نەرێنی خۆی بکات و کاربکات بۆ بەرەوپێشبردنی بیرکردنەوەی ئەرێنی.
دروستکردنی بۆشایی تایبەت: هەبوونی بۆشایی خۆی یارمەتی کەسێکی گۆشەگیر دەدات بەسەر هەستە نەرێنییەکاندا زاڵ بێت، بەو پێیەی دەتوانێت پەنایان بۆ ببات کاتێک هەست بە ماندووبوونی کەسانی دیکە دەکات و دوای نەمانی ئەم هەستانە دەتوانێت بە وزەی نوێوە سەرهەڵبدات.
دەربڕینی سوپاسگوزاری: مرۆڤی دەروونگەرا دەبێت بەردەوام سوپاس و پێزانینی خۆی بۆ کەسانی دیکە دەرببڕێت، وەک چۆن مرۆڤەکان ئەو کەسانەیان خۆشدەوێت کە وایان لێدەکەن هەست بە قەدرزانی بکەن و ئەمەش ڕەنگە وا لە کەسانی دیکە بکات سوپاسگوزاری خۆیان بەرامبەر کەسە گۆشەگیرەکە دەرببڕن، ئەمەش یارمەتی دەدات بەسەر گۆشەگیریەکەیدا زاڵ بێت.
گەشبینی: مرۆڤی دەروونگەرا دەبێت مەیلی بەرەو گەشبینی و ئەرێنی هەبێت، چونکە گەشبینی یارمەتی دەدات لە نەرێنییەکەی ڕزگاری بێت.
هاندانی خود بۆ مامەڵەکردن بە ئاشکرا: مرۆڤی دەروونگەرا دەتوانێت هانی خۆی بدات بۆ پەرەپێدانی پەیوەندییەکانی لەگەڵ مرۆڤەکان و دروستکردنی هاوڕێیەتی و ئەمەش یارمەتی دەدات بۆ ڕزگاربوون لە کەسایەتییە دەروونگەراکە.
خۆبەزەیی (هاوسۆزی خود): هەندێکی تر مەیلیان هەیە بۆ هاوسۆزی کەسایەتیە کۆمەڵایەتی و دۆستانەکان بەزۆری، بەڵام هاوسۆزی کەسی خۆپەرست نییە، بۆیە دەبێت کەسی دەروونگەرا هاوسۆزی لەگەڵ خۆیدا هەبێت.
کەسایەتی گۆشەگیر (دەروونگەرا)
ئەو کەسانەی کە کەسایەتییەکی گۆشەگیریان هەیە، زیاتر لە قسەکردن و دەربڕینی ئەوەی لە ناوەوەیاندایە، مەیلیان بۆ ئارامبوونەوە و بیرکردنەوە و ئەنجامدان هەیە، هەروەها بەپێی زۆرێک لە تیۆرییەکانی کەسایەتی، هەموو مرۆڤەکان کۆمەڵێک تایبەتمەندی گۆشەگیر و کراوەیان لە کەسایەتییەکانیاندا هەیە، بەڵام بەزۆری زیاتر مەیلیان بۆ لایەنێکیان هەیە زیاتر لە لایەنەکەی تر، و ئەمەش وای لێدەکات یان گۆشەگیر یان کراوە بن. شایەنی باسە کە کەسایەتی دەروونگەرا پلە و جۆری جیاوازی هەیە، وەک: دەروونگەراینی کۆمەڵایەتی، بیرکردنەوە، دڵەڕاوکێ و هتد، وە بڕی دەروونگەراینی کەسێک ڕەنگە لەگەڵ کات و ئەو بارودۆخەی لە ژیاندا پێیدا تێدەپەڕێت بگۆڕێت، ڕەنگە کەم تا زۆر دەروونگەرا بێت لەگەڵ کاتدا.
