ناوه‌ڕۆك
سەرەتا
بنێشت یەکێکە لەو ماددانەی زۆر بە خراپی بە جلوبەرگەکاندا دەنوسێت، لەوانەیە لەسەر کورسییەکی گشتی دابنێشتبیت و بنێشت بە پانتۆڵەکەتدا نوسابێت. هەوڵدان بۆ لابردنی بنێشت بە بێ تەکنیکێکی گونجاو لەوانەیە زیاتر دۆخەکە بشێوێنێت و زیان بە جلوبەرگەکەت بگەیەنێت.
حەوت ڕێگەی ئاسان بۆ لێکردنەوەی بنێشت لە جلوبەرگ
- سەهۆڵ: بنێشتەکان جۆرێک ماددەیان تێدایە کە کاردانەوەیان هەیە بۆ گۆڕانی پلەی گەرما و بە سەرما توند دەبنەوە، ئەم تەکنیکە کاتێک بەکار دەهێنرێن کە بنێشتەکە زۆر تێکەڵ بە جلوبەرگەکان نەبووبێت، ئەم ڕێگەیە دەکرێت بۆ لێکردنەوەی بنێشت لە هەموو جلوبەرگ و کەلوپەلێک بەکاربهێنرێت.
پارچە سەهۆڵێک لەسەر بنێشتەکە دابنێ بۆ ماوەیەک تا بنێشتەکە توند دەبێت پاشان بە نینۆک یان بە چەقۆیەک بە هێواشی لە قوماشەکەی بکەرەوە.
- ئوتو کردن: وەک چۆن بنێشت کاردانەوەی بۆ سەرما هەیە بە گەرمکردنیش شل دەبێتەوە و بە ئاسانی لا دەبرێت.
پارچە کارتۆنێک دابنێ و قوماشەکەی بەسەردا بدە، پاشان ئوتووی بکە تا بنێشتەکە گەرم دەبێت و دەنوسێت به کارتۆنەکەدا ئەگەر پاشماوەی بنێشتەکە بەجێمابوو چەند جارێک دووبارەی بکەرەوە.
- گەرمکردن: کاتێک بنێشتەکە بە توندی بە جلوبەرگەکاندا نوساوە یان بۆ ماوەیەکی زۆرە ماوەتەوە لەو کاتەیا هەڵم یان قژوشککەرەوە بەکاربهێنیت بە ئاسانی لێ دەبێتەوە.
قوماشەکە دابنێ و قژوشککەرەوەی بۆ بەکار بهێنە پاشان بە نینۆک یان بە چەقۆیەک بە وریاییەوە لێی بکەرەوە.
- ئاوی گەرم: ئاوی گەرم یان سرکەی گەرم ڕێگەیەکی ئاسان و باشە بۆ لێکردنەوەی بنێشتەکە، هەندێک ئاو بکوڵێنە و قوماشەکەی تێبکە و بۆ ماوەیەک بیهێڵەرەوە تا بنێشتەکە نەرم دەبێت پاشان بە فڵچەیەک لێی بکەرەوە و چەند جارێک دووبارەی بکەرەوە تا بە تەواوی لێدەبێتەوە.
- ڕۆنی گوێزی هیندی: ڕۆنی گوێزی هیندیش یەکێکە لە ڕێگا باشەکان بۆ لێکردنەوەی بنێشت لە جلوبەرگەکان و یارمەتی نەرمکردنەوەی بنێشتەکە دەدات و بە ئاسانی لێدەبێتەوە.
هەندێک زەیتی گوێزی هیندی گەرم بکە و قوماشەکەی تێبکە و بۆ ماوەیەک جێی بهێڵە پاشان بە فڵچەیەک هەوڵی لێکردنەوەی بدە و ئەگەر بە یەکجار لێنەبوویەوە چەند جارێک دووبارەی بکەرەوە و پاشان قوماشەکە بشۆ بۆ لێکردنەوەی زەیتەکە.
- شامپۆی جلشۆردن: شامپۆی جلشۆردنیش دەتوانێت یارمەتی لێکردنەوەی بنێشتەکە بدات، شامپۆکە لەسەر قوماشەکە دابنێ و بە فڵچەیەک هەوڵی لێکردنەوەی بدە ئەگەر پێویستی کرد بە وریاییەوە چەقۆیەک بەکاربهێنە بۆ لێکردنەوەی و دواتر قوماشەکە بشۆ.
- نەوت و بەنزین: نەوت و بەنزین شلەی بەهێزن بۆیە تەنها پێویستە لەو کاتانەدا بەکاربهێنرێت کە بنێشتەکە زۆر بە توندی بە جلوبەرگەکاندا نوساوە و ڕێگاکانی تر سەرکەوتوو نەبوون لە لێکردنەوەیدا.
پارچە ئیسفنجێک بە نەوت یان بەنزینەکە تەڕ بکە و بۆ بنێشتەکەی بەکاربهێنە دڵنیاببەرەوە لەوەی قوماشەکە بە بەنزین یان نەوتەکە تەڕ بووە و پاشان بە چەقۆیەک بە وریاییەوە هەوڵی لێکردنەوەی بدە و پاش لێکردنەوەی قوماشەکە بشۆ بۆ لێکردنەوەی پاشماوەی بنێشتەکە و بۆنەکەی.
