ناوهڕۆك
سەرەتا
بەرکەوتنی تیشکی خۆر (بە ئینگلیزی; Sun exposure) بە مەبەستی وەرگرتنی کۆمەڵێک سوودی جەستەیی و تەندروستییە، چونکە لە تیشکی خۆردا چەندین تیشک هەن کە دەتوانن سوود بە مرۆڤ بگەیەنن، بۆ نموونە دەتوانن لە دروستکردنی ڤیتامین D یارمەتیدەر بن، کاری هۆرمۆنی میلانین باشتر دەکەن، هەروەها دەکرێت کاریگەرییەکی باشییان هەبێت لەسەر باری جەستە و دەروونی کەسەکان.
باشترین کات بۆ بەرکەوتنی تیشکی خۆر بەپێی ڕۆژ و وەرز و تەنانەت شوێنی جوگرافی و دۆخی کەش و هەوا ئەوەی ئاخۆ هەوری هەیە یاخود ئاسمان ساماڵە دەگۆڕێت. هەروەها تەنانەت پێستی کەسەکەش لێرەدا گرنگی هەیە لە ڕووی ڕێژەی ماددەی میلانین، ئەو کرێم و دژە خۆرانەی بەکاری دەهێنێت، هەروەها جلوبەرگی پۆشراویش. بوونی ئەو هەمە جۆر هۆکارانەی کار دەکەنە سەر بڕی تیشکی خۆر و گەیەشتنی بۆ پێستی کەسەکان ئەوە دەرەخات، ئەگەر بە هەمان کاتژمێری وەک یەکیش مرۆڤەکان خۆیان بدەنە بەر خۆر هەمان بڕی تیشک وەرناگرن.
باشترینی کاتی ڕۆژ بۆ بەرکەوتنی تیشکی خۆر
لە هاویناندا باشترین کات بریتییە لە کاتژمێرەکانی پێش کاتژمێر ١١ ی پێش نیوەڕۆ هەروەها کاتژمێرەکانی دوای کاتژمێر چواری دوای نیوەڕۆ. لەو کاتانەدا تیشکی خۆرەکە ئەوەندە بەهێز نییە کەسەکە بێزاربکات بە گەرمییەکەی و هەروەها زیانت پێ بگەیەنێت.
پێویستە دووربکەوینەوە لە خۆدانە بەر تیشکی خۆر لە ناوەڕاستی ڕۆژ دا کاتژمێرەکانی نێوان ١١ ی نیوەڕۆ بۆ ٤ ی دوای نیوەڕۆ. بە تایبەت کاتێک تیشکی خۆرەکە گەرمیەکی تاقەت پروکێنی دەبێت یاخود سێبەری کەسەکە نزمتر دەبێت لە باڵاکەی. دەبێت ئەوە بزانین بە دوورکەوتنەوەمان لە خۆدانە بەر خۆر لەو کاتانەی ڕۆژ دەتوانین پارێزگاری بکەین لە سووتانەوەی پێست لە بەر خۆر، برینداربوونی خانەکانی پێست و تەشەنەسەندنی شێرپەنجەی پێست.
