ناوه‌ڕۆك
ناساندن
ڕێگاکانی سەرکەوتن لە بازاڕگەری (بە ئینگلیزی: Ways to succeed in marketing، بە عەرەبی: طرق النجاح في التسويق)، بازاڕگەری یان بەبازاڕکردن بوارێکی گەشەکردووە و بەردەوام لە گەشەسەندایە. هەڵبژاردنی بەکاربەران لە بازاڕگەریدا بەردەوام لە گۆڕانکاریدایە و پێویستە ڕێوشوێنەکانی بازاڕکردن لەگەڵیان بگۆڕێت. ئەمە پیشەیەکە کە پێویستی بە باشترکردنی کارامەیی و ڕاهێنانی بەردەوام هەیە.
ڕێگاکانی سەرکەوتن لە بازاڕگەری
١- دیاریکردنی پێداویستییەکانی کڕیار
هەنگاوی یەکەم لە داهێنانی بازاڕکردن ئەوەیە کە تێبگەیت کڕیارەکانت چییان دەوێت و پێویستیان بە چیە، هەروەها دەتوانیت شیکردنەوەی داتا بەکاربهێنیت یان گەڕان لە تۆڕە کۆمەڵایەتییەکان بە دیاریکردنی پێداویستییەکانی کڕیار.
٢- بیرکردنەوە لە ڕوانگەی کڕیارەکان
بازاڕکەران پێویستە ئەم تەکنیکە سەرنجڕاکێشە تاقی بکەنەوە کە تێیدا کڕیارەکانیان وێنا دەکەن و دەچنە ناو مێشکی کڕیارەکانەوە و بۆ ئەوەی بەڕاستی ببینن و هەست بەوە بکەن کە کڕیار ئارەزووی چی دەکات، ئەمە دەتوانێت یارمەتی بازاڕکەران بدات لە دروستکردنی ناوەڕۆکی باشتر، وا لە ماددەی بازاڕکردن دەکات تایبەتمەندتر بێت و پێشکەشکردنی بەهێزتر دروست بکات.
٣- پەیوەندی دروست بکە
خەڵک نایانەوێت تۆ تەنها بەرهەمێک بفرۆشیت پێویستە پەیوەندییەک دروست بکەیت کە لە فرۆشتن زیاتر بێت، ئەوە دەربارەی زانینی پێداویستییەکانی کڕیارەکانە و وایان لێدەکات بزانن چۆن بەرهەمەکە یان خزمەتگوزارییەکە دەتوانێت پێویستییەکانیان پڕبکاتەوە. ئەم ڕێگەیە نەک تەنها یارمەتی پرۆسەی فرۆشتن دەدات، بەڵکو دەتوانێت ببێتە هۆی دڵسۆزبوونی کڕیار. گرنگ ئەوەیە کە لە کاتی فرۆشتندا گرنگی تەنها بە بەرهەمەکە نەدەیت، بەڵکو لەسەر کڕیار کاربکە و گفتوگۆیەک دروست بکە و متمانە دروست بکە.
٤- ڕکابەرەکانت بناسە
بزانە ڕکابەرەکانت چی دەکەن ئەمە نموونەیەکی سەرەکییە بۆ کارکردنی زیرەکتر، ڕکابەرەکانت هەروەک خۆت زیرەک و کاریگەرن و لەوانەیە هەندێکیان بودجەیەکی گەورەتریان هەبێت، گرنگی بەوە بدە چۆن ڕیکلام دەکەن و پەیامی سەرەکیان چیە لە ڕیکلامەکانیاندا و چی جۆرە ڕێکلامێک دەکەن.
٥- تێبگە لە بازاڕ چی ڕوودەدات
لە زۆر ڕووەوە کاریگەری چالاکییەکانی بازاڕکردن پشت دەبەستێت بە ئاستی تێگەیشتن لە بازاڕ و بیردکنەوەی بەکاربەران. بازرگانێک کە دەزانێت چۆن لە کردارەکانی کڕیار و ڕکابەرەکان تێبگات دەتوانێت زۆر شت بەدەست بهێنێت. هەموو ڕێگاکانی توێژینەوە بەکاربهێنە و فێری ببە و پشت بە داتاکان ببەستە. هەندێک جار گفتوگۆی کەسی لەگەڵ کڕیارێک دەتوانێت زانیاری زیاتر پێشکەش بکات. بۆ چالاکییە سەرکەوتووەکانی بازاڕکردن پێویستە فێربیت چۆن هەست بە بازاڕ و پێداویستییەکانی بکەیت.
٦- هەمیشە فێربە
خراپترین شت کە بازاڕکار یان فرۆشیار دەتوانێت بیکات ئەوەیە کە بیر لەوە بکاتەوە کە هەموو شتێک دەزانێت و واز لە فێربوون و کۆکردنەوەی زانیاری نوێ بهێنێت. بازاڕکردن بەردەوام لە گۆڕانکاریدایە و لە هەمان کاتدا ڕێگا و ستراتیجییەکان دەگۆڕدرێن. ڕکابەرەکان ڕەفتارەکانیان دەگۆڕن و خۆیان لەگەڵ بەکاربەران دەگونجێنن. ئەگەر لە هەمان شوێن بمێنیتەوە، کێبڕکێ لەدەست دەدەیت.
٧- خۆگونجاندن لەگەڵ دیجیتاڵ مارکێتینگ
تەنانەت ئەگەر پسپۆڕ بیت لە بازاڕکردنی نەریتی (تەقلیدی) دەبێت شارەزاییت لە بەناوبانگترین سیستم و ئامرازە دیجیتاڵییەکان هەبێت. هەموو ساڵێک کڕیارەکان زیاتر چالاک دەبن بۆ کڕینی ئۆنلاین. بۆیە ئەو فرۆشیارانەی کە دەیانەوێت سەرکەوتوو بن بەدوای ترێندەکاندا دەگەڕێن و ترێندی نوێ دەدۆزنەوە و بۆ سوودی خۆیان بەکاریدێنن.
٨- دیاریکردنی باشترین نرخ
پێویستە بزانیت کڕیارەکان چەند پارە دەدەن بۆ دەستکەوتنی پێداویستیەکانیان ئەگەر کاڵاکانت بە تێچوونی کەمتر یان بەرهەمی باشتر بچنە بازاڕەوە ئەوا دەتوانیت سەرکەوتن بەدەست بهێنیت. ئەم زانیارییە یارمەتیت دەدات بڕیار بدەیت کە ئایا دەتوانیت لە رێی بەرهەمەکەتەوە قازانج بەدەست بهێنیت.
٩- یارمەتی کرداری فرۆشتن
کۆتا فاکتەر لە بازاڕکردنی سەرکەوتوو ئەوەیە کە ئاسانکاری بکات بۆ کڕیارەکان بۆ کڕینی بەرهەمەکە. بەربەستەکانی کڕیار بۆ ئەنجامدانی کڕینەکە بریتین لە: نائاسوودەیی، چاوەڕوانی زۆر لە گەشتنی کاڵاکە، بازاڕکردنی سەرکەوتوو بریتییە لە لابردنی یان کەمکردنەوەی ئەو بەربەستانە.
١٠- پلانی بازاڕکردن
کاتێک بڕیارت لەسەر ستراتیژی بازاڕکردنەکەت دا، پلانێکی بازاڕکردن ئامادە بکە کە چۆنیەتی جێبەجێکردنی ئەو ستراتیژییە دیاری دەکات و سەرکەوتنەکەی هەڵدەسەنگێنیت. پێویستە پلانەکە بە بەردەوامی پێداچوونەوەی بۆ بکرێت و ئەگەر پێویست بکات نوێ بکرێتەوە بۆ ئەوەی بتوانیت بە خێرایی وەڵام بدەیتەوە بۆ گۆڕانکاری لە پێداویستی و هەڵوێستی کڕیار.
١١- گەڕان بەدوای دەرفەتەکان
زۆر گرنگە کە بەدوای دەرفەتدا بگەڕێیت بۆ هەمەجۆرکردنی پرۆسەی بازاڕکردن. ئەمە مانای ئەوە نییە کە پشت بە یەک ستراتیژ یان تاکتیک ببەستیت، بەڵکو بەدوای بژاردەی جۆراوجۆردا بگەڕێت بۆ دۆزینەوەی تێکەڵەیەکی گونجاو بۆ بزنسەکەت. ئەو ستراتیجییانەی کە ئەمڕۆ بە باشی کاردەکەن لەوانەیە سبەینێ کاریگەر نەبن، بۆیە زۆر گرنگە کە لەگەڵ دوایین ئاڕاستە و گۆڕانکارییەکانی بازاڕدا بمێنینەوە. هەمەجۆرکردنی هەوڵەکانی بازاڕکردن یارمەتیت دەدات بۆ گەیشتن بە کڕیاری زیاتر.ستراتیژی جیاواز دەتوانێت تۆڕێکی فراوانتر دروست بکات. هەروەها، ڕێگەت پێدەدات کە لە پێشەوەی پێشبڕکێ بمێنیتەوە.
١٢- بەکارهێنانی ڤیدیۆ لە ستراتیژی نوێی بازاڕ
ڤیدیۆ یەکێکە لە ئامرازە بەهێزەکان بۆ بازاڕکردنی بەرهەمەکەت یان خزمەتگوزاریەکەت. ئەمە دەتوانێت پەیوەندییەکی بەهێز دروست بکات لەگەڵ بازاڕی ئامانجەکەت و بە شێوەیەکی سەرنجڕاکێش و براندەکەت بەرز بکاتەوە. بەکارهێنانی ڤیدیۆ لە ستراتیژی نوێی بازاڕەکەت دەتوانێت بگاتە بینەرێکی فراوانتر و کاریگەرییەکی هەمیشەیی دروست بکات کە هانیان دەدات بازرگانی لەگەڵ تۆ بکەن.
ڤیدیۆ دەتوانرێت بە شێوەی جۆراوجۆر بەکاربهێنرێت بۆ بازاڕکردنی بەرهەمەکەت یان خزمەتگوزاریەکەت. دەتوانیت ڤیدیۆی کورت و زانیاری بەرهەم بهێنیت بۆ ناساندنی کۆمپانیاکەت و ڕوونکردنەوەی ئەوەی کە پێشکەشی دەکەیت. هەروەها دەتوانیت ڤیدیۆی درێژتر دروست بکەیت بۆ نیشاندانی چۆنیەتی کارکردنی بەرهەمەکەت.
