ناوه‌ڕۆك
ناساندن
گەورەترین خانوو لە جیهاندا (بە عەرەبی: كبر بيت في العالم، بە ئینگلیزی: The largest house in the world) کۆشکی ئیستان نورول ئیمان گەورەترین خانووە لە جیهاندا ئەو کۆشکەیە کە سوڵتان حەسەن بۆلکیای برونێی تێیدا نیشتەجێیە، بارەگای حکوومەتی برۆناییە، پلانی دروستکردنی لەلایەن ئەندازیاری فلیپینی لیاندرۆ لۆکسینی پێنجەمەوە دانراوە، خوان شیاو دیزاینی ناوچەکانی ناوەوەی کردووە. لەلایەن کۆمپانیای بیناسازی فلیپینی ئایالا ئینتەرناشناڵەوە پارەی بۆ دابینکراوە،
لە ساڵی ١٩٨٤ تەواو بووە و نزیکەی یەک ملیار و ٤٠٠ ملیۆن دۆلاری تێچووە. دەکەوێتە کەناری ڕووباری برۆنێی، بەرەو باشوور درێژ دەبێتەوە تا پایتەختی بەندەر سێری بێگاوان، لە نێوان دارەکاندا هەڵکەوتووە کە جوانی دیمەنەکانی زیاتر کردووە. بە گەورەترین کۆشکی نیشتەجێبوون لە جیهاندا پۆلێن کراوە، لەم بابەتەدا زیاتر لەبارەیەوە ئاشناتان دەکەین.
سوڵتان حەسەن کێیە؟
سوڵتانی برونێی حەسەن تەمەنی نزیکەی ٦١ ساڵە، لە ڕیزی دەوڵەمەندترین کەسانی جیهاندا پۆلێن کراوە، سامانەکەی لە ٣٣ ملیار دۆلار تێدەپەڕێت و لە هەر خولەک و نیوێکدا نزیکەی ٩٠ یۆرۆ زیاد دەکات. یەکێکە لە دەوڵەمەندترین سەرۆکەکانی دەوڵەت، بە ئیسرافی و خۆشەویستی بۆ سەروەت و سامان و کۆکردنەوەی گەوهەرە بەنرخەکانی ناسراوە. لە هەموو کارێکیدا زۆر پشت بە زێڕ و ئەڵماس دەبەستێت، تا ئەو ڕادەیەی کەوچکی زێڕ بۆ خواردن بەکاردەهێنێت.
دیزاینی کۆشکی ئیستان نورول ئیمان
ڕووبەری کۆشکەکە نزیکەی ٢٠٠٠ هەزار مەتر چوارگۆشەیە (نزیکەی ٢١٥٢٧٨٢ پێی چوارگۆشە)، کە لە ١٧٨٨ ژوور پێکهاتووە، هەندێکیان بە زێڕ و ئەڵماس ڕازێنراونەتەوە. ئەم ژوورانە نزیکەی ٦٥٠ تابلۆی هونەری تێدایە، هەرزانترینیان بەهای لە ١٥٠ هەزار یۆرۆ کەمتر نییە. ٢٥٧ حەمام و هۆڵێکی ئاهەنگگێڕانی تێدایە کە نزیکەی ٥ هەزار میوان لەخۆدەگرێت، لەگەڵ هۆڵێکی تری ئاهەنگگێڕان کە بۆ ٤ هەزار کەسە. جگە لەوەش مزگەوتێکی هەیە کە ١٥٠٠ نوێژخوێن لە خۆدەگرێت، لەگەڵ گەراجێکی چاککردنەوەی ئۆتۆمبێل کە توانای لەخۆگرتنی نزیکەی ١١٠ ئۆتۆمبێلی هەیە.
جێگای ئاماژەیە، سوڵتان خاوەنی کۆمەڵەیەکی گەورەی ئۆتۆمبێلە، کە کۆی گشتی نزیکەی ٥ هەزار ئۆتۆمبێلی ناوازە و دەگمەنە. هەروەها کۆشکەکە ٥ مەلەوانگە و یاریگای گۆڵف و تەوێڵگەی ئەسپ و شارێکی یاری کات بەسەربردن لەخۆدەگرێت کە یارییە وەرزشییە گرانبەها ونایابەکانی تێدایە. بەهۆی قەبارەکەیەوە، نزیکەی ٤٤ پلیکانە و ١٨ بەرزکەرەوەی تێدایە، کە بە نزیکەی ٥٦٤،٥١٠،٠٠٠ چرای کارەبایی ڕووناک دەکرێنەوە.
بەکارهێنانەکانی کۆشکی ئیستان نورول ئیمان
کۆشکەکە هەم وەک شوێنی نیشتەجێبوونی تایبەتی سوڵتان و هەم وەک ناوەندی هەموو کاروباری دەوڵەت لە ژێر دەسەڵاتی حکومەتی برونێیدا بەکاردێت. نووسینگەی سەرۆک وەزیرانی تێدایە و وەک بارەگای فەرمی حوکمڕانی برۆنێی بەکاردێ. ژوورێکی تەختی تێدایە کە بۆ چەندین بۆنەی ڕێوڕەسمی وەک ڕۆژی لەدایکبوون و ڕاگەیاندنی میراتگر و وەبەرهێنانی ساڵانە بەکاردەهێنرێت، کۆشکەکە تەنها لە بۆنە تایبەتەکانی وەک جەژنی ڕەمەزاندا دەرگاکانی بەڕووی خەڵکدا دەکاتەوە. سەردانکەر پێویستی بە ڕۆژێکی تەواو هەیە بۆ گەڕان بە هەموو ژوورەکانی کۆشکەکە، بە تێکڕا نزیکەی نیو خولەک لە بۆ هەر ژوورێک.
