ناوه‌ڕۆك
سەرەتا
چاندنی تەڕەتیزە (بە ئینگلیزی: planting cress، بە عەرەبی: زراعة حب الرشاد)، سەوزەیەکی بەسوودە و تامێکی خۆشی هەیە لەهەمان کاتدا بە خێرایی گەشەدەکات و گونجاوە بۆ چاندن لە باخچەکاندا، جێگەیەکی کەمی پێویستە بۆ گەورەبوون و تەنانەت لە ئینجانەشدا گەشەدەکات، ژمارەیەکی زۆر جۆری هەیە کە تام و جێگەی گەشەکردنیان جیاوازی تێدایە.
هەنگاوەکانی چاندن لە دەرەوەدا
- ئەگەر ئارەزووی بەرهەمێکی گەورەی تەڕەتیزە بکرێت پێویستە لە خاکدا بچێنرێت.
- سەرەتا خاکەکەی بۆ بکێڵرێت و ئامادەبکرێت.
- پاشان تۆوەکان بە تەنکی بپرژێنرێن بەسەر خاکەکەدا.
- ئاوی باشی پێبدرێت و بە شێداری بهێڵرێتەوە.
- کاتێک گەشەدەکەن و دەگەن درێژی ٢.٥ سانتیمەتر، پێویستە تەنکبکرێن و مەودا بە بنجەکان بدرێت هەتاکوو گەورەببن.
- دواتر کاتێک درێژییەکەیان دەگاتە ١٢-١٥ سانتیمەتر دەکرێت لێبکرێنەوە و بەکاربهێنرێن.
هەنگاوەکانی چاندن لە ماڵەوەدا
- سەرەتا پێویستە ئینجانەیەکی قوڵی بۆ دابین بکرێت.
- پڕکردنەوەی ئینجانەکە بە خاکێکی بەپیت.
- دواتر تۆوەکەی بەسەر ڕووی خاکەکەدا بپرژێنرێت، نابێت زۆر بخرێنە قوڵاییەوە چونکە دواتر تۆوەکان پێشبڕکێ دەکەن لەسەر جێگە.
- بە بەردەوامی بە شێداری بهێڵرێتەوە، دەکرێت بە بەرگێک دابپۆشرێت و ئاوی کەمی بەسەردا بپرژێنرێت.
- دواتر لە جێگەیەکی گەرم و ڕووناکدا جێگیر بکرێت.
- تۆوەکەی لەماوەی ٢٤ کاتژمێردا چەکەرە دەکات.
- دوای چەکەرەکردنیش لەماوەی هەفتەیەکدا ئامادە دەبێت بۆ لێکردنەوە.
شێوازی گرنگیپێدان
تەڕەتیزەکان بۆ چەکەرە کردن پێویستیان بە جێگەیەکە کە بڕێکی زۆر ڕووناکی خۆری هەبێت، دواتریش پێویستیان بە ئاو و شێی زۆر هەیە، ئەگەر جێگەکەشیان لە دەرەوەدا بێت دەکرێت بەرگەی هەندێک پلەی گەرمی بەرز بگرن، بەڵام لە ژوورەوە لە نزیک پەنجەرەدا دادەنرێت بۆ ئەوەی ڕووناکی و گەرمی گونجاویان هەبێت، کاتێک تەڕەتیزەکان پێدەگەن لە بنەوە تەنها نزیکەی یەک سانتیمەتری جێدەهێڵرێت و بەشەکانی سەرەوەیان دەبڕدرێت، تەڕەتیزە بڕاوەکانیش سەرلەنوێ گەشەدەکەنەوە و گەورە دەبن.
